Túrkistanda jańajyldyq bezendirýge qansha qarjy jumsalady

TÚRKІSTAN. KAZINFORM – Túrkistan qalasy ákimdiginiń habarlaýynsha, oblys ortalyǵyn jańajyldyq bezendirýge bıýdjetten qarjy qarastyrylmaǵan.Rýhanı astana qaladaǵy shaǵyn sáýlettik nysandar men dekoratıvtik qurylymdar esebinen bezendiriledi. Jańa elementter men merekelik oryndar seriktester men demeýshilerdiń qoldaýymen iske asady.

Qalada úsh negizgi jańajyldyq shyrsha – Ákimshilik-iskerlik ortalyqta, Mádenı-rýhanı ortalyqta jáne Jeńis saıabaǵynda ornatylmaq. 

– Bıyl jańajyldyq bezendirýge bıýdjetten qarjy bólinbeıdi. Biz qoldanystaǵy konstrýktsııalardy paıdalanamyz, al keıbir elementter demeýshiler esebinen ornatylady. Olardyń quramy men qatysý úlesi barlyq uıymdastyrý máseleleri kelisilgennen keıin anyqtalady, – dedi Túrkistan qalasy ákimdigi kommýnaldyq sharýashylyq bóliminiń bas mamany Muhamed Adyrbek.

Qazir qosymsha bezendirýler usynýǵa jáne merekelik lokatsııalar jasaýǵa daıyn seriktesterdi tartý jumystary júrgizilip jatyr. Vedomstvo ókilderi qysqy is-sharalar baǵdarlamasynyń talqylanyp jatqanyn da habarlady.

– Biz merekelik oryndardyń ártúrli nusqalaryn qarastyramyz. Olardyń formaty seriktesterdiń usynystaryna jáne demeýshilik qoldaý múmkindikterine baılanysty, - dep naqtylady mamandar.

Jańajyldyq bezendirýge arnalǵan jeke shyǵyndardyń bolmaýy tek oblys ortalyǵyna ǵana emes, búkil Túrkistan oblysyna da qatysty. Ekonomıka jáne bıýdjettik josparlaý basqarmasynda oblys bıýdjetinen jańajyldyq sharalardy ótkizýge qarajat qarastyrylmaǵany atap ótildi.

Buǵan deıin Óskemen, Pavlodar ákimdikteri jańa jyldyq rásimdeýge qansha qarajat bóletini habarlanǵan bolatyn.