Túrkistanda jańa sý qoımasy 9,7 myń gektar jerdi sýmen qamtıdy
ASTANA. KAZINFORM — Syıymdylyǵy 68 mln tekshe metr bolatyn «Báıdibek ata» sý qoımasynyń qurylysy aıaqtalýǵa jaqyn, dep habarlaıdy Úkimettiń baspasóz qyzmeti.
Úkimet sý qaýipsizdigin qamtamasyz etý jáne sý sharýashylyǵy ınfraqurylymyn jańǵyrtý salasynda Memleket basshysynyń tapsyrmalaryn oryndaý boıynsha júıeli jumysty jalǵastyryp keledi. Osy mindetterdiń júzege asyrylý barysyn baqylaý sheńberinde sý resýrstary jáne ırrıgatsııa mınıstri Nurjan Nurjigitov Túrkistan oblysynda salynyp jatqan jańa «Báıdibek ata» sý qoımasynyń qurylys barysymen tanysty.
— Syıymdylyǵy 68 mln m3 bolatyn sý qoımasy Bógen ózeniniń kóktemgi aǵynyn jınaqtap, vegetatsııalyq kezeńde qosymsha sý qoryn paıdalanýǵa múmkindik beredi. Sý qoımasynyń aýmaǵy — 220 ga, bógettiń uzyndyǵy — 3,9 shaqyrym. Nysan paıdalanýǵa berilgennen keıin qosymsha sý kólemimen 9,7 myń ga sýarmaly jer qamtamasyz etiledi. Qazirgi tańda nysannyń daıyndyq deńgeıi 86%. Qurylysty aǵymdaǵy jyldyń sońyna deıin aıaqtaý josparlanǵan, — deıdi mamandar.
Kóktemgi aǵyn kezeńinde jınalǵan sý keıin aýyl sharýashylyǵy qajettilikterine paıdalaný úshin Bógen sý qoımasyna jiberiledi. Bul sý resýrstaryn jyl boıy barynsha birkelki bólýge jáne sýǵa suranys eń joǵary kezeńde sharýalardy sýmen qamtý senimdiligin arttyrýǵa múmkindik beredi.
Vedomstvonyń baspasóz qyzmeti atap ótkendeı, sýarmaly eginshilik alqaptary aýqymdy Túrkistan oblysy úshin sý jınaqtaý ınfraqurylymyn damytý — sý qaýipsizdigin nyǵaıtýdyń negizgi baǵyttarynyń biri. Jańa sý qoımalaryn salý tasqyn jáne maýsymdyq kezeńderdegi sý aǵynyn jınaqtap, sýǵa qajettilik artqan kezde paıdalanýǵa múmkindik beredi. Sý sharýashylyǵy ınfraqurylymyn damytý jumystary basqa da nysandarda jalǵasyp jatyr.
Bıyl Túrkistan oblysynyń Tóle bı aýdanynda syıymdylyǵy 1,2 mln m3 bolatyn «Qaraqýys» sý qoımasynyń qurylysy aıaqtaldy. Ol 500 ga sýarmaly jerdi aǵyn sýmen qamtamasyz etýge arnalǵan. Budan bólek, Islam damý bankimen birlese úsh jańa sý qoımasyn — Jambyl oblysyndaǵy «Aqmola», Qyzylorda oblysyndaǵy «Qaraózek» jáne Batys Qazaqstan oblysyndaǵy «Úlken Ózen» sý qoımalaryn salý jobalary júzege asyryla bastady. Úsh joba boıynsha da konkýrstyq rásimder júrgizilip jatyr.
Buǵan deıin Qazaqstanda 42 jańa sý qoımasy salynatynyn jazǵan edik.
