Túrkistanda zań buzýshylyqqa jol bergen birneshe sheneýnikti qyzmetten bosatý usynyldy
TÚRKІSTAN. KAZINFORM – Túrkistan oblysynda Ádep jónindegi keńestiń otyrysynda birneshe laýazymdy tulǵanyń qyzmetinen bosatý jáne tártiptik jaza qoldaný máselesi qaraldy.
Búgin Memlekettik qyzmet isteri agenttiginiń Túrkistan oblysyndaǵy Ádep jónindegi keńestiń otyrysy ótti. Onda zańdylyqty saqtaý jáne laýazymdy adamdardyń jaýapkershiligin arttyrý máseleleri talqylandy.
Jıynda eldimeken shegindegi jer ýchaskelerin tabystaýda, qurylys nysandaryn qabyldaýda jáne bilim berý uıymdaryndaǵy zań buzýshylyqtarǵa baılanysty tıisti sheshim qabyldandy.
– Atap aıtqanda, Saıram aýdany ákiminiń orynbasary, Saıram aýdany Qarabulaq aýyldyq okrýgi ákimi, Túrkistan qalasy Bilim, Qurylys bólimderiniń basshylaryn atqaryp otyrǵan laýazymdarynan bosatý týraly sheshim qabyldaý usynyldy, – delingen departamenttiń habarlamasynda.
Sondaı-aq Saıram aýdanynyń Qutarys, Mankent aýyldyq okrýgi ákimderine jáne Kentaý qalasy Hantaǵy aýyldyq okrýgi ákimine, Keles aýdanynyń Sáýlet, qala qurylysy jáne qurylys bóliminiń basshysyna «qyzmetke tolyq sáıkes emestigi týraly eskertý» túrinde tártiptik jaza qarastyryldy.
Budan bólek, Túlkibas aýdany Sastóbe kentiniń ákimine «qatań sógis» túrinde tártiptik jaza qoldaný usynyldy.
Budan buryn BQO-da bylapyt sóz aıtqan memlekettik qyzmetshi qatań sógis alǵanyn jazǵan edik.
