Túrkistanda «Voice of Turan — 2026» halyqaralyq festıvali ótedi
ASTANA. KAZINFORM — 25-27 qyrkúıek aralyǵynda Túrkistan qalasyndaǵy «Kerýen saraı» týrıstik kesheninde halyqaralyq «Voice of Turan — 2026» qazaq ánderi festıvali ótedi. Bul týraly Túrkistan oblysy ákiminiń orynbasary Ertaı Altaev Ortalyq kommýnıkatsııalar qyzmetinde ótken brıfıngte málimdedi.
Onyń aıtýynsha, bıyl jetinshi ret uıymdastyrylatyn festıvalge Frantsııa, Ispanııa, Italııa, San-Marıno, Týnıs, Venesýela, Indonezııa, Vatıkan, Belarýs, Bolgarııa, Tyva, Grýzııa, Armenııa, Meksıka, Marokko, Kýba, Gvıneıa, Qarachaı Respýblıkasy, Bashqurtstan jáne Brazılııa elderinen kelgen ónerpazdar qatysady.
Festıvaldiń negizgi maqsaty — qazaq mýzykasyn halyqaralyq deńgeıde nasıhattaý, Uly dalada qalyptasqan án ónerin álemdik mádenı keńistikke shyǵarý jáne Túrkistandy túrki dúnıesiniń rýhanı-mádenı ortalyǵy retinde tanytý.
Óz kezeginde jobanyń bas prodıýseri Meıirjan Alıakbarov baıqaýdyń ereksheligine toqtalyp ótti.
— Bul dodanyń basqa baıqaýlardan ereksheligi — kásibı vokaldyq baıqaý emes. Bul — qazaq ánderin oryndaýshylardyń baıqaýy, ıaǵnı oryndalatyn shyǵarmalardyń deni — halyq ánderi men Qazaqstan kompozıtorlarynyń týyndylary. Munda daýys dıapazony keń, ándi bar múmkindigimen shyrqap, vokaldyq qabiletin kórsetetin oryndaýshy emes, qazaq ánin barynsha júregine sińirip, kórermenge jetkize biletin ánshi jeńiske jetedi, — dedi ol.
Festıvaldiń alǵashqy kúni, 25 qyrkúıekte «Zhibek zholy áýenderi» gala-kontserti ótedi. Keshte Qyrǵyzstan, Ázerbaıjan, Bashqurtstan, Tyva, Qaraqalpaqstan men Ózbekstannan kelgen ánshiler jáne qazaqstandyq tanymal ónerpazdar óner kórsetedi.
26 qyrkúıekte festıvaldiń saltanatty ashylý rásimi jáne «Juldyzdy jup» kezeńi uıymdastyrylady. Bul kúni sheteldik qatysýshylar qazaqstandyq óner sheberlerimen birge qazaq ánderin jáne zamanaýı shyǵarmalardy oryndaıdy.
Al 27 qyrkúıekte negizgi baıqaý — «Qazaq áni» kezeńi ótedi. Qatysýshylar halyq ánderi men qazaq kompozıtorlarynyń shyǵarmalaryn kásibı qazylar alqasy men kórermen nazaryna usynady.
Sondaı-aq baǵdarlamada kontsertterden bólek qolónershiler aýyly, túrkitildes elder dızaınerleriniń sherýi jáne ózge de mádenı is-sharalar qarastyrylǵan.
Aıta keteıik, buǵan deıin Aqmola oblysynda ekinshi mádenı-týrıstik Flamingo Fest festıvali ótkeni týraly jazǵanbyz.
