Túrkistanda veterınarııa salasynda 928 mln teńge jymqyrylyp, 4 adam qamaýǵa alyndy
ASTANA. KAZINFORM — Túrkistan oblysynyń prokýratýrasy «Veterınarııalyq qyzmet» ShJQ MKK qyzmetinde 928 mln teńge kóleminde bıýdjet qarajatyn jymqyrý shemasyn anyqtady.
2022–2025 jyldar aralyǵynda Vetqyzmettiń basshylary men jaýapty qyzmetkerleri satyp alýlar (taýarlar, qyzmetter jáne t. b.) barysynda tólem tapsyrmalaryna kórineý jalǵan málimetter engizý arqyly 928 mln teńgeni negizsiz jáne zańsyz aýdarǵan.
Atap aıtqanda, kásipkerlik sýbektilerine aqsha aýdarý kezinde ózderiniń ETsQ-laryn paıdalanyp, zańsyz áreketterin jasyrý maqsatynda tólem tapsyrmalarynda birdeı bıznes sýbektileriniń JSN-daryn engizip, tek ataýlaryn ózgertip otyrǵan.
Naqtysynda kásipkerlik sýbektileri tarapynan Vetqyzmetke qyzmetter kórsetilmegen jáne taýarlar jetkizilmegen.
Laýazymdy tulǵalardyń zańsyz áreketteri saldarynan memleketke iri kólemde zalal keltirilgen.
Atalǵan fakt boıynsha oblys prokýratýrasy materıaldardy Qylmystyq kodeksiniń 189-baby 4-bóligimen SDTBT-ne tirkep, sotqa deıingi tergep-tekserýdi arnaıy prokýrorlar (oblys prokýratýrasynyń Sotqa deıingi tergep-tekserý basqarmasy) júrgizip jatyr.
— 26 naýryzda 4 laýazymdy tulǵa (Vetqyzmettiń eki burynǵy basshysy, orynbasary jáne bas býhgalteri) kúdikti dep tanylyp, qamaýǵa alyndy. Qazir basqa da laýazymdy tulǵalardyń qatystylyǵyn anyqtaýǵa baǵyttalǵan qajetti tergeý áreketteri júrgizilýde. QR Qylmystyq-protsestik kodeksiniń 201-babynyń talaptaryna sáıkes ózge aqparat jarııa etýge jatpaıdy, — delingen habarlamada.
Budan buryn Atyraýda 8 veterınarııalyq stantsııa biriktiriletinin jazǵanbyz.
