Túrkistanda valıýtalyq zańnamany buzǵan kásiporyn 175,9 mln teńge aıyppul tóleıdi
ASTANA. KAZINFORM – Túrkistan oblysynda eksporttyq valıýtalyq túsimdi elge qaıtarý talabyn oryndamaǵan kásiporynǵa 175,9 mln teńge aıyppul salyndy.
Oblys prokýratýrasynyń málimetinshe, valıýtalyq zańnamanyń saqtalýyna júrgizilgen taldaý barysynda «TÝRAN AGRO ET-SÚT» aýyl sharýashylyǵy óndiristik kooperatıviniń eksporttyq túsimdi Qazaqstandaǵy banktik shottarǵa qaıtarý mindettemesin oryndamaǵany anyqtalǵan.
Kooperatıv pen Ózbekstannyń «JAM MAX» JShS arasynda jasalǵan syrtqy ekonomıkalyq kelisimshart aıasynda 1 mln 766 myń AQSh dollarynan astam somaǵa taýar eksporttalǵan. Alaıda sheteldik seriktes jetkizilgen ónim úshin tólem júrgizbegen.
«Sonyń saldarynan kooperatıv eksporttan túsken valıýtany Qazaqstan Respýblıkasyndaǵy ýákiletti bankterdegi shottarǵa qaıtarý jónindegi zań talaptaryn oryndamaǵan. Osyǵan baılanysty kásiporyn Ákimshilik quqyq buzýshylyq týraly kodekstiń 251-baby boıynsha jaýapkershilikke tartyldy. Birinshi satydaǵy sot 8,65 mln teńge kóleminde aıyppul belgilegenimen, prokýratýra materıaldyq quqyq normalarynyń durys qoldanylmaǵanyn anyqtap, apellıatsııalyq ótinishhat engizdi», – dep habarlady Túrkistan oblysynyń prokýratýrasy.
Apellıatsııalyq sot prokýratýranyń ýájderin qoldap, birinshi satydaǵy sot qaýlysyn ózgertti. Nátıjesinde ákimshilik aıyppul kólemi zań talaptaryna sáıkes 175 mln 946 myń teńge bolyp belgilendi.
Prokýratýranyń málimetinshe, qabyldanǵan sharalar memleket múddesin qorǵaýǵa múmkindik bergen.
Aıta keteıik, Almatyda qoljetimdi orta talaptaryn saqtamaǵandarǵa 2 mln teńgeden astam aıyppul salyndy.
