Túrkistanda ushqyshsyz ushý apparattarynyń operatorlaryn daıarlaý ortalyǵy ashyldy
ASTANA. KAZINFORM - Túrkistan oblysynyń polıtsııa departamentinde ushqyshsyz ushý apparattarynyń operatorlaryn daıarlaý jáne praktıkalyq oqytý ortalyǵy ashyldy.
ІІM málimetinshe jańa ortalyq polıtsııa qyzmetkerleriniń zamanaýı tehnologııalardy meńgerip, drondy jedel-qyzmettik jumystarda tıimdi paıdalaný daǵdylaryn jetildirýge múmkindik beredi.
Ashylý barysynda merdiger kompanııasynyń mamandary arnaıy jabdyqtar men sımýlıatsııalyq keshenniń múmkindikterin tanystyrdy. Qatysýshylar ushqyshsyz ushý apparattaryn basqarý, ushyrý jáne qondyrý boıynsha praktıkalyq jattyǵýlardy tamashalady.
Túrkistan oblysy PD bastyǵynyń orynbasary Seıitjomart Seıithan oqý ortalyǵynyń ashylýyna úles qosqan árbir jannyń eńbeginiń mańyzyn atap ótti. Sondyqtan ortalyqtyń materıaldyq-tehnıkalyq bazasyn qalyptastyrýǵa jumys jasaǵan azamattarǵa Túrkistan oblysy polıtsııa departamentiniń basshylyǵy tarapynan alǵys bildirip, birqataryna arnaıy marapattar tabystady.
— Oqý ortalyǵynda Túrkistan oblysy PD-niń jedel qyzmetteri, tabıǵatty qorǵaý polıtsııasy men patrýldik polıtsııa bólimsheleriniń qyzmetkerleri oqytylyp, olardyń kásibı daıarlyǵyn arttyrýǵa baǵyttalǵan sabaqtar turaqty túrde júrgiziletin bolady, — dedi Seıitjomart Seıithan.
Joba polıtsııa qyzmetine zamanaýı tsıfrlyq tehnologııalardy engizip, qoǵamdyq qaýipsizdikti qamtamasyz etýdiń tıimdiligin arttyrýǵa baǵyttalǵan.
Aıta ketelik Qazaqstan polıtsııasy robot-ıt pen smart-beıdj múmkindikterin kórsetken edi.
