Túrkistanda úsh kúnde joldy kesip ótken 100-den astam adam jaýapqa tartyldy
TÚRKІSTAN. KAZINFORM – Túrkistanda jaıaý júrginshilerge baqylaý kúsheıtildi.
Túrkistan qalasynda jaıaý júrginshilerine qatysty jol-kólik oqıǵalarynyń aldyn alý maqsatynda reıdtik is-shara ótti.
– Reıd barysynda polıtseıler jaıaý júrginshiler jıi júretin kósheler men jol ótkelderinde túsindirý jumystaryn júrgizip, jol qozǵalysy erejelerin saqtaý boıynsha profılaktıkalyq sharalar uıymdastyrdy. Nátıjesinde belgilenbegen oryndardan joldy kesip ótken 100-den astam azamatqa ákimshilik shara qoldanyldy, – dep habarlady oblystyq polıtsııa departamenti.
Túrkistan qalasy ákimdigi aqparattyq qaýipsizdik bólimshesiniń málimetinshe, ótken jyly qala aýmaǵynda 410 beınebaqylaý kamerasy ornatylǵan. Onyń ishinde 200 kamera jańǵyrtýdan ótkizilgen.
Ornatylǵan kameralardyń 40-y zamanaýı analıtıkalyq múmkindiktermen jabdyqtalǵan. Bul analıtıkalyq kameralar bet-álpetti taný (Face ID), memlekettik tirkeý nómir belgilerin anyqtaý, sondaı-aq kúdikti áreketterdi avtomatty túrde tirkeý fýnktsııalaryn atqarady.
– Beınekamaralar qalanyń ortalyq kóshelerinde, áleýmettik nysandar mańynda, adam kóp shoǵyrlanatyn aýmaqtar men jol qıylystarynda ornatylǵan. Beınejazbalar jedel basqarý ortalyǵyna onlaın rejımde jetkizilip, quqyq qorǵaý organdaryna quqyq buzýshylyqtardyń aldyn alýǵa, jedel áreket etýge jáne tergeý jumystaryn tıimdi júrgizýge múmkindik beredi, – delingen aqparatta.
Budan buryn Túrkistanda qoǵamdyq oryndardy lastaǵandarǵa 210 mln teńgege jýyq aıyppul salynǵanyn jazǵan edik.
