Túrkistan oblysynda jumyssyzdar sany qansha
TÚRKІSTAN. KAZINFORM – Respýblıkadaǵy kópbalaly otbasylardyń tórtten biri Túrkistan oblysyna tıesili. Munda eńbekke qabiletti jastardyń úlesi mol. Sondyqtan jumys oryndaryn ashý máselesi ózekti bolyp qala beredi. Oblys ákimi Darhan Satybaldy eseptik kezdesýinde jumyssyzdyq sebepterin aıtyp berdi.
«Bizdiń óńir demografııalyq ósim boıynsha birinshi orynda tur. Bul jerde ýrbanızatsııalyq qozǵalys ta bolyp turady. Oblys halqynyń 80 paıyzy aýyldyq jerde turǵandyqtan, eń kóp jumyssyzdyq aýyldyq jerde baıqalady. Bizde eńbekke qabiletti 850 myń azamat bar, sonyń 400 myńǵa jýyǵy turaqty jumys isteıdi, qalǵan 46 paıyzy – ózin-ózi jumyspen qamtyǵandar. Bul sanatqa aýyl sharýashylyǵy salasynda isteıtinder, saýdamen aınalysatyndar, taksı sekildi qyzmet kórsetý salasynda júrgender kiredi. Ózge óńirlerde, ásirese Astanada qurylys salasynda jumys istep júrgen túrkistandyqtar bar», - dedi D. Satybaldy Ortalyq kommýnıkatsııalar qyzmetinde.
Ákimniń aıtýynsha, ózin-ózi jumyspen qamtyǵandar tabysyn kórsetpeıdi, sondyqtan jumyssyzdyq deńgeıi kóbirek dep aıtylyp júr. Biraq resmı statıstıka sońǵy 10 aıdaǵy jumyssyzdyq deńgeıi 4,8 paıyz ekenin kórsetip otyr.
«Árıne jumyssyzdyq boıynsha bizdiń de josparymyz bar. Oblys ortalyǵy Túrkistanǵa kóshkendikten, óndiris oryndary men tabys kózi Shymkentte qaldy. Sondyqtan basym baǵytty ındýstrııaǵa, jańa jumys oryndaryn ashýǵa bólemiz. Sonyń esebinen jumyssyzdyq deńgeıin azaıtyp, azamattardyń ómir sapasyn kóteremiz. Jýyrda Ulybrıtanııanyń Qazaqstandaǵy elshisi Ketı Lıch hanym Túrkistanǵa kelip, shetelge jumys kúshterin daıyndaıtyn Arnaıy ortalyqtyń ashylýyna qatysty. Bul ortalyq Ulybrıtanııa jáne Ońtústik Koreıada jumys istegisi keletin azamattardy oqytyp, daıyndaıdy», - dedi oblys ákimi.
Sondaı-aq, júıeli jumystyń arqasynda sońǵy eki jylda Túrkistanda ataýly áleýmettik kómek alýshylar sany 2 esege deıin nemese 53%-ǵa azaıǵan. ıAǵnı 2022 jyly ataýly áleýmettik kómek alýshylar sany 198 myń adam bolsa, búginde 92,4 myń adamdy qurap otyr.
Aıta keteıik, oblystaǵy ındýstrııalyq aımaqtarǵa qolaıly jaǵdaı jasaý úshin ındýstrııalyq aımaqtarda elektr energııasy tarıfi 47 teńgeden 25 teńgege deıin arzandatyldy.
Sondaı-aq, Túrkistan qalasynda 147 mlrd teńgege maqtany tereń óńdeıtin iri zaýyttyń qurylysy bastaldy. Zaýytta 4 myńnan astam jumys orny ashylyp, jylyna 13 myń tonna ıirilgen jip, 50 mıllıon metr úı toqyma buıymdary, 7 mıllıon dana tósek-oryn shyǵarady.