Túrkistanda tútinsiz temeki ónimderin zańsyz óndiretin tseh jumysy toqtatyldy

TÚRKІSTAN. KAZINFORM – Túrkistan qalasynda tútinsiz temeki ónimderin zańsyz óndirý jáne ótkizý faktisi boıynsha Omashev pen Tashpýlatovqa qatysty sot úkimi shyǵaryldy, dep habarlaıdy Qarjylyq monıtorıng agenttigi.

Agenttiktiń Túrkistan oblysy boıynsha departamenti júrgizgen is aıasynda arnaıy operatsııa barysynda jalpy aýmaǵy 1000 sharshy metrdi quraıtyn, kún saıyn 30-dan astam jumysshy jumyldyrylǵan jasyryn óndiristik tseh áshkerelendi.

Tekserý kezinde shıkizatty daıyndaýdan bastap logıstıkany uıymdastyrýǵa jáne Astana, Almaty, Shymkent qalalaryndaǵy iri kóterme jetkizýshiler arqyly satý arnalaryna deıingi qylmystyq árekettiń tolyq shemasy anyqtaldy.

- Zańsyz aınalymnan tyıym salynǵan 635 qorap daıyn ónim, sondaı-aq azamattardyń densaýlyǵyna zııandy 57 kanıstr hosh ıistendirgishter men ýytty qospalar tárkilendi, - delingen aqparatta.

Sot sanktsııasymen óndiristik jabdyqtar men qylmystyq jolmen alynǵan tabysqa satyp alynǵan avtokólikke tyıym salyndy. Úkimge sáıkes, zańsyz bıznestiń uıymdastyrýshylaryna aıyppul jazasy taǵaıyndalyp, avtokólik pen jabdyqtar memleket kirisine tárkilendi.

Úkim zańdy kúshine engen joq.

Aıta keteıik, Jambyldaǵy shekaradan 233 mln teńgeniń temekisin jasyryp ótkizbek bolǵandar ustaldy.