Túrkistanda turmysy tómen 11 myń otbasy gazdy qymbat baǵaǵa alyp kelgen
Túrkistan oblysynda qadaǵalaý organy tutynýshylarǵa taýarlyq gazdy tıist baǵada satpaý faktilerin anyqtady, dep habarlaıdy Kazinform.
2022 jyly Ulttyq ekonomıka mınıstrligi eldiń barlyq óńirinde memlekettik áleýmettik jáne turǵyn úı kómegin alýshylarǵa gazdyń bólshek saýdadaǵy tarıfin 20% tómendetýge kelisken.
Ol úshin oblys ákimdigi men «QazTransGaz Aımaq» AQ arasynda ózara memorandým túzilgen.
Alaıda jergilikti atqarýshy organ áleýmettik osal azamattardyń derbes derekterin jınaý qajettigine baılanysty memorandýmǵa qol qoıýdan bas tartqan.
Munyń bári kórsetilgen sanat turǵyndaryna tarıfti ýaqtyly qoldanýǵa kedergi keltirgen.
Prokýrorlyq qadaǵalaý aktisin qaraý nátıjesinde ákimdik 11 myń abonenttiń gaz tarıfin tekshe metrine 35,7 teńgeden 28,54 teńgege tómendetýge memorandým jasady.
