Túrkistanda túrki órkenıetine arnalǵan ortalyq ashylý kerek – Aqtoty Raıymqulova
ASTANA. KAZINFORM – Halyqaralyq túrki mádenıeti jáne murasy qorynyń prezıdenti Aqtoty Raıymqulova Jibek Joly telearnasynyń «Ýáde» baǵdarlamasynda túrki álemine ortaq mýzeı ashý bastamasy jóninde pikir bildirdi.
Qor basshysynyń aıtýynsha, mundaı bastamalar túrli ǵylymı otyrystarda talqylanady. Degenmen eshbir mýzeı óziniń qundy jádigerin túpkilikti berýge daıyn emes. Qazaqstanda da tarıhı artefaktini kóshpeli kórmege shyǵarýǵa ǵana ruqsat bar.
– Túrki áleminiń jádigerleri álemniń túrli tanymal mýzeılerinde de saqtaýly. Olardy bilýimiz kerek, kórýimiz kerek. Sol sebepti, bizdiń oıymyzsha, vırtýaldy mýzeıler bolýy kerek. Osy maqsatta Astanadaǵy Alem.ai ortalyǵynda Turk Heritage platformasy ashylyp, túrki dúnıesiniń vırtýaldy mýzeıi, vırtýaly arhıvi jáne vırtýaldy kitaphanasy qurylmaq. ıAǵnı, túrki elderindegi mádenıet mınıstrlikteriniń aýmaqty jumysy bir portalǵa jınaqtalady, – dedi Aqtoty Raıymqulova.
Sonymen birge, spıker Túrkistanda túrki órkenıetine arnalǵan ortalyq ashý qajettigin de atap ótti.
– Men qazir barsha túrki elderine ortaq qaǵıdatpen qaraýym kerek. Degenmen, bizdiń Túrkistanda túrki órkenıetiniń ne mýzeıi, ne ortalyǵy ashylýy qajet. Óıtkeni biz – túrki órkenıetiniń tal besigimiz, muny barlyq túrki elderi moıyndaıdy. Bul jaqyn bolashaqta bolatyn nárse sekildi. Sebebi osy másele óte ózekti bolyp otyr. Árıne, mundaı mýzeıdi túrki elderiniń kez kelgeninde ashýǵa bolady. Biraq Túrkistan – túrki halyqtarynyń rýhanı astanasy, – dedi qor prezıdenti.
Aıta keteıik, jyl sońyna deıin Astanadaǵy Alem.ai ortalyǵynda Turk Heritage atty Dúnıejúzilik túrki murasy platformasy ashylady.
