Túrkistanda týrıstik polıtsııa bir aıda 650-ge jýyq azamatqa qyzmet kórsetti

TÚRKІSTAN. KAZINFORM – Túrkistandaǵy týrıstik polıtsııa sońǵy bir aıda 650-ge jýyq azamatqa qyzmet kórsetti, dep habarlaıdy Polisia.kz.

Elimizdiń týrıstik tartymdylyǵyn arttyrý maqsatynda Іshki ister mınıstrliginiń bastamasymen Túrkistanda týrıstik polıtsııa qurylǵan. Bul bólim ınspektorlary shetel azamattarynyń qaladaǵy jaılylyǵy men qaýipsizdigin qamtamasyz etedi.

Týrıstik polıtseıler sheteldikterge elimizde bolý erejelerin túsindiredi, kóshi-qon zańnamasyn buzǵan adamdardy anyqtaıdy, ótinishterdi esepke alady jáne týrıstik aımaqty patrýldeıdi.

Búginde týrısterge qyzmet kórsetý vzvodynda 25 qyzmetker bar. Olar Qoja Ahmet ıAsaýı kesenesi, «Kerýen saraı» kesheni, Prezıdent saıabaǵy sııaqty týrıster kóp jınalatyn oryndarda qyzmet atqarady.

Sońǵy aıda týrıstik polıtsııa qyzmetine júgingen azamattar negizinen belgili bir mekenjaıǵa, tamaqtaný oryndaryna jáne kórikti jerlerge jetý jolyn suraǵan. Polıtseıler marshrýtty túsindirip, taksı shaqyrýǵa kómektesken jáne qajetti aqparat bergen.

Sheteldikterden bólek, otandastar da joǵalǵan balany tabý nemese umytylǵan jeke zattar men telefondardy qaıtarý boıynsha kómek suraıdy.

Týrıstik polıtsııa qyzmetkerleri beınetirkeýishtermen, planshettermen jáne ratsııamen jabdyqtalǵan. Olar qazaq, orys, túrik, qytaı jáne aǵylshyn tilderin, sondaı-aq el tarıhyn jetik meńgergen. Budan bólek, qala aýmaǵynda týrısterge arnalǵan «SOS» batyrmasy jumys isteıdi.

Aıta keteıik, Túrkistanda elektrondy qyzmetke degen suranys artyp keledi.