Túrkistanda turǵyndar jaıylym jerdiń jekege ótip ketkenine narazylyq bildirdi
TÚRKІSTAN. KAZINFORM – Túrkistan oblysynyń Tólebı aýdanyna qarasty Tóńkeris eldi mekeniniń turǵyndary aýyl mańyndaǵy ortaq jaıylym jerlerdiń jekeniń qolyna ótip ketkenine narazylyq bildirdi.
Olardyń aıtýynsha, buryn mal erkin jaıylatyn aýmaqtar búginde qorshalyp, halyqqa qoljetimsiz bolyp qalǵan.
Áleýmettik jelide taraǵan vıdeolarda turǵyndar keıbir jer telimderiniń betonmen qorshalǵanyn aıtyp, tipti ózen arnasynyń da jalǵa berilgenin alǵa tartqan. Olar bul jaǵdaıdyń zańdylyǵyna kúmán keltirip otyr.
Turǵyndardyń aıtýynsha, jaıylym tapshylyǵy saldarynan mal jaıý qıyndaǵan. Osyǵan baılanysty olar jaıylym jerlerdi halyq ıgiligine qaıtarýdy talap etip, quzyrly organdardan tekserý júrgizýdi surady.
Osy máselege baılanysty Kazinform tilshisine Tólebı aýdany ákimdigi resmı túsinik berdi.
Ákimdik málimetinshe, Qaratóbe aýyldyq okrýgine qarasty Tóńkeris eldi mekenindegi «Baldyberek-Agro» JShS-ne tıesili jalpy alańy 73,37 gektar aýyl sharýashylyǵy maqsatyndaǵy jer ýchaskesiniń bir bóligi nysanaly maqsatyna saı paıdalanylmaǵan.
– Osyǵan baılanysty Túrkistan oblysynyń mamandandyrylǵan aýdanaralyq ekonomıkalyq soty 2026 jylǵy 10 sáýirde jalpy kólemi 952,2 sharshy metr jer ýchaskesin májbúrlep alyp qoıý týraly uıǵarym shyǵarǵan. Atalǵan uıǵarymǵa sáıkes, 15 sáýirde «Baldyberek-Agro» JShS-ne qarasty aýmaqta nusqamada kórsetilgen kemshilikterdiń joıylý-joıylmaýyn anyqtaý maqsatynda tekserý júrgizý josparlandy, – delingen vedomstvonyń aqparatynda.
Osyǵan oraı Tóńkeris eldi mekeninde Qaratóbe aýyldyq okrýginiń 40 turǵyny qatysqan kóshpeli sot otyrysy ótti. Onda turǵyndar jaıylym jerdiń zańsyz qorshalǵanyn, káriz júıesiniń júrgizilgenin jáne ózen aýmaǵynyń jeke kásipkerge jalǵa berilgenin aıtyp, kináli tulǵalardy jaýapqa tartýdy talap etken.
– Otyrys qorytyndysy boıynsha anyqtalǵan kemshilikterdi qalpyna keltirý jóninde turǵyndardyń qatysýymen hattama ázirlenip, Túrkistan oblysynyń mamandandyrylǵan aýdanaralyq ekonomıkalyq sotyna joldandy. Qazirgi tańda sot protsesi jalǵasyp jatyr. Naqty sheshim sot talqylaýy aıaqtalǵannan keıin qabyldanady, – dep málimdedi aýdan ákimdigi.
Budan buryn Tólebı aýdanynda demalys aımaǵyna qomaqty qarjy salǵan 40-qa jýyq kásipker jerinen aıyrylý qaýpine tap bolǵanyn jazǵan edik.
