Túrkistanda turǵyndar kópqabatty úıdi memlekettik týmen bezendirdi
TÚRKІSTAN. KAZINFORM — Túrkistan qalasynda Táýelsizdik kúnine oraı bezendirilgen kópqabatty úıdiń kórinisi kópshiliktiń kóńilin eljiretti.
Elge degen qurmetten týǵan bul ıgi is turǵyndar tarapynan qolǵa alynǵan. Shahardaǵy 1-shaǵynaýdanda ornalasqan № 3 kópqabatty úıdiń turǵyndary óz baspanalaryn memlekettik rámizdermen, azattyq jolynda kúresken tulǵalardyń beınelerimen jáne merekelik elementtermen aıshyqtady.
Bastamaǵa uıytqy bolǵan kópqabatty úıdiń turǵyny Gúlnaz Oryntaeva qaı salada eńbek etsek te, táýelsizdikti kózdiń qarashyǵyndaı saqtap, qadirine jete bilýimiz kerek degen pikirin jetkizdi.
— Elimizdiń táýelsizdigi ońaı jolmen kelgen joq. Biz muny ásirese, ósip kele jatqan jastarǵa tereńirek uǵyndyrýymyz kerek. Bastama osyndaı nıetten týdy. Bul áreketke kórshilerim de birden qoldaý bildirdi. Osy kópqabatty úıdiń ózinde 20-dan asa búldirshin turady. Balalarymyz otanshyl, bilimdi bolyp ósse, táýelsizdigimiz de máńgi bolady, — dedi ol.
Budan buryn Táýelsizdik kúni qarsańynda Almaty oblysynda jańa ortalyq ashylǵanyn jazǵan edik.