Túrkistanda tsıfrlyq tehnologııalar tıimdilikti arttyryp jatyr

TÚRKІSTAN. KAZINFORM — Túrkistan qalasynda engizilip jatqan tsıfrlyq jobalar turǵyndar úshin yńǵaıly ári qoljetimdi memlekettik qyzmet kórsetýdi qamtamasyz etip otyr.

Memleket basshysy Qasym-Jomart Toqaev óz Joldaýlarynda tsıfrlandyrýdyń mańyzdylyǵyn únemi atap ótip keledi. Prezıdenttiń aıtýynsha, tsıfrlyq sheshimder memlekettik basqarýdyń tıimdiligin arttyryp qana qoımaı, qoǵamda ashyqtyq pen eseptilikti qamtamasyz etedi. «Tsıfrlyq Qazaqstan» memlekettik baǵdarlamasynyń basty maqsaty — halyqqa qyzmet kórsetýdi jeńildetip, qoljetimdi etý. Bul baǵytta óńirlerde, onyń ishinde Túrkistan qalasynda da birqatar júıeli sharalar júzege asyrylyp jatyr.

Búgingi tańda Túrkistan qalasy ákimdigine qarasty bólimder qyzmetinde zamanaýı tsıfrlyq jobalar keńinen engizilýde. Olardyń negizgi maqsaty — memlekettik qyzmetterdi turǵyndarǵa qoljetimdi ári tıimdi etý. Máselen, «E-otinish» biryńǵaı platformasy arqyly azamattar ótinishterin elektrondy túrde joldap, olardyń qaralý barysyn onlaın qadaǵalaı alady. Buryn qujat tapsyrý úshin birneshe kún ýaqyt ketse, búginde birneshe mınýtta rásimdeýge múmkindik bar. Bul óz kezeginde turǵyndardyń ýaqytyn únemdep qana qoımaı, memlekettik organdardyń ashyqtyǵyn kúsheıtip otyr.

Sondaı-aq ákimdik bólimderinde ishki qujat aınalymy tolyqtaı derlik elektrondy formatqa kóshirilýde. «Documentolog» júıesi qujattardy tirkeý, kelisý jáne qol qoıýdy onlaın rejımde júzege asyrýǵa múmkindik beredi. Buryn qaǵazbastylyqtan týyndaıtyn ýaqyt shyǵyny aıtarlyqtaı azaıyp, qyzmettiń jedeldigi artty. Ákimdik qyzmetkerleri bir qujatty birneshe mekeme arasynda qolma-qol tasymaı-aq, júıe arqyly jedel baǵyttaı alady.

Qala aýmaǵyn basqarýda geoaqparattyq portaldyń orny erekshe. Bul júıe ınfraqurylym, jer telimderi, qurylys nysandary jáne basqa da mańyzdy málimetterdi karta arqyly kórýge múmkindik beredi. Mundaı sheshim qala qurylysy men jer qatynastaryna baılanysty sheshimderdi qabyldaýdy jeńildetip, ınvestorlar úshin de qolaıly jaǵdaı týǵyzdy. Geoaqparattyq júıe arqyly bos jer ýchaskeleri, ınjenerlik ınfraqurylymnyń jaǵdaıy nemese josparlanǵan qurylys aımaqtary týraly naqty derekter alýǵa bolady.

Memlekettik qyzmetterdiń barynsha elektrondy formatqa kóshýi de aıtarlyqtaı nátıjesin berýde. Qala turǵyndary «Elektrondy úkimet» portaly arqyly kúndelikti qajet qyzmetterdiń basym bóligin onlaın ala alady. Bul azamattardyń ýaqytyn únemdep qana qoımaı, qyzmet sapasyn arttyryp otyr. Ásirese jastar men tsıfrlyq saýaty joǵary azamattar úshin bul júıeniń tıimdiligi zor.

Sonymen qatar «E-qyzmet» platformasy da engizilip, memlekettik organdar arasyndaǵy ishki ákimshilik protsesterdi avtomattandyrýǵa jol ashty. Qyzmettik jazbalardy joldaý, buıryqtar daıyndaý, ótinimder berý sııaqty jumystar endi tolyqtaı elektrondy túrde júrgiziledi. Mundaı sheshim kadrlyq is júrgizýdi de aıtarlyqtaı jeńildetti.

Jalpy alǵanda, Túrkistan qalasynda engizilip jatqan tsıfrlyq jobalar turǵyndar úshin yńǵaıly ári qoljetimdi memlekettik qyzmet kórsetýdi qamtamasyz etip otyr. Bul baǵyttaǵy jumystar aldaǵy ýaqytta da jalǵasyn tabatyny sózsiz. Prezıdent Joldaýlarynda atap kórsetilgendeı, tsıfrlandyrý — memlekettik basqarýdyń jańa deńgeıin qalyptastyrýǵa jol ashatyn basty qural. Sondyqtan Túrkistandaǵy bastamalar ózge óńirler úshin de úlgi bola alady.

Aıta keteıik, budan buryn Túrkistanda elektrondy qyzmetke degen suranys artyp kele jatqanyn jazǵan bolatynbyz.