Túrkistanda toı kortejin uıymdastyrǵan júrgizýshiler jaýapqa tartyldy
TÚRKІSTAN. KAZINFORM – Túrkistan oblysynda jol qozǵalysy erejelerin óreskel buzǵan birneshe júrgizýshi anyqtalyp, ákimshilik jaýapkershilikke tartyldy. Bul týraly oblystyq polıtsııa departamenti habarlady.
Áleýmettik jelilerge júrgizilgen monıtorıng nátıjesinde Saýran aýdanynda ótken qyz uzatý toıy kezinde túsirilgen beınejazba tabylǵan. Vıdeodan birneshe kólik ıesiniń qoǵamdyq tártipke qaıshy áreketterge barǵany anyq baıqalǵan. Atap aıtqanda, Mercedes-Benz, Toyota jáne Nexia 5 avtokólikteri jol qozǵalysynyń qaýipsizdigine qater tóndirgen.
– Polıtsııanyń tekserýi barysynda júrgizýshilerdiń kólikti memlekettik tirkeý nómirinsiz basqarǵany, manevr jasaý erejelerin buzǵany, jolaýshylardy tasymaldaý talaptaryn saqtamaǵany jáne jolda apattyq jaǵdaı týdyrǵany belgili boldy. Sonymen qatar keıbir kólikterge zaqym keltirilgeni tirkelgen. Barlyq kólik quraly aıypturaǵyna qoıyldy, - delingen Túrkistan oblystyq polıtsııa departamenti taratqan aqparatta.
Ataı keteıik, budan buryn Túrkistanda jasóspirimder balalar oıyn alańyn qıratqanyn jazǵan bolatynbyz.