«Tórlet, naýryz, tórime!»: Túrkistanda respýblıkalyq komandalyq aıtys ótti
TÚRKІSTAN. KAZINFORM - Alaman aıtysty Qazaqstannyń eńbek sińirgen qaıratkeri, Májilis depýtaty Amanjol Áltaev júrgizdi. Dúbirli dodadaǵa qatysqan qos óńirdiń aqyndary túre, súre, qaıym, qyz ben jigit aıtysy janrlarynda synǵa tústi. Sondaı-aq, jyrshylar men termeshiler, dástúrli ánshiler men kúıshiler is-sharanyń kórigin qyzdyrdy.
Aıtysqa arnaıy qatysqan oblys ákimi Darhan Satybaldy arnaıy qatysyp, kórermen qaýymdy merekemen quttyqtady.
«Tól ónerimiz – aıtys jańasha formatta qarqyn aldy. Dástúrli án óneri men kúı, terme janrlarynyń jańǵyrýy – ulttyq ónerge jasalǵan oń betburys dep bilemin. Sondyqtan qasıetti Syr dalasynan bastalyp, Túrkistan topyraǵyna taban tiregen búgingi jobanyń halyqqa bereri mol. Qazirgi tańda Túrkistanǵa erekshe mártebe berý týraly bastama kóterilip, arnaıy zań jobasy ázirlendi. Bıylǵy jyly Túrkistan – Túrki áleminiń týrıstik astanasy atanyp otyr. El mádenıetin damytýǵa baǵyttalǵan sharalardyń kóptep ótýi – osy bastamalardyń júzege asýyna oń yqpalyn tıgizedi dep senemin», – degen oblys ákimi qos óńirdiń ónerpazdary sáttilik tiledi.
Al, Jambyl oblystyq mádenıet, arhıvter jáne qujattama basqarmasynyń basshysy Erlan Júnisbaı oblys ákiminiń quttyqtaý sálemin jetkizdi.
Aıtys qorytyndysymen respýblıkalyq komandalyq aıtystyń ekinshi kezeńine Túrkistan oblysynyń komandasy joldama aldy. Qos komandaǵa birdeı qurmet kórsetilip, árbir aqynǵa 500 myń teńgeden syıaqy berildi. Al jyrshy, termeshi, dástúrli ánshi, kúıshilerge 250 myń teńgeden tabystaldy.
Sondaı-aq «AMANAT» partııasynyń arnaıy syılyǵy berildi.
