Túrkistanda tólenbegen 18 aıyppuly bar júrgizýshi jalǵan nómirmen ustaldy
TÚRKІSTAN. KAZINFORM — Túrkistan oblysynda respýblıkalyq mańyzy bar tas joldaǵy Saýran shep-beketinde «Qorǵaý» júıesi arqyly qaýipti júrgizýshi qolǵa tústi.
Polıtsııa málimetinshe, júrgizýshi LEXUS ES 300 avtokóligin jalǵan nómir taǵyp júrgizgen.
— Aqparattyq bazalar arqyly tekserý barysynda jas jigittiń jol qozǵalysy erejelerin óreskel buzyp, jyldamdyqty asyrý deregi boıynsha 18 ret aıyppul salynǵany anyqtaldy, — dep habarlady oblystyq polıtsııa departamenti.
Atalǵan avtokólik arnaıy aıypturaqqa qoıyldy. Zańǵa sáıkes júrgizýshi 1 jyl merzimge kólik basqarý quqyǵynan aıyrylyp, barlyq tólenbegen aıyppulyn ótedi.
Eske salaıyq, taıaýda Senat depýtaty Marat Qojaev jol erejesin jıi buzatyndar aıyppuldy joǵary somada tóleýi kerek ekenin aıtty.
Atap aıtqanda, elimizde jol erejesin buzǵandar aıyppul salynǵan kúnnen bastap bir aptanyń ishinde tólese, onda osy aıyppuldyń jartysyn ǵana óteý múmkindigi jasalǵan. Alaıda senator bul jeńildik jol erejesin tym kóp buzatyndarǵa qoldanylmaýy kerek ekenin málim etti.
Budan buryn Túrkistan oblysynda áıel júrgizýshi eki balany qaǵyp ketkenin jazǵan edik.
