Túrkistanda tóbelesken basqarma basshysy qyzmetinen ketýi múmkin

TÚRKІSTAN. KAZINFORM – Túrkistan oblysynyń Memlekettik sáýlet-qurylys baqylaýy basqarmasynyń basshysyn Ádep kodeksi talaptaryn saqtamaı, qoǵamdyq rezonans týdyrǵany úshin atqaratyn memlekettik laýazymynan shyǵarý týraly sheshim qabyldandy.

Búgin Memlekettik qyzmet isteri agenttiginiń Túrkistan oblysyndaǵy Ádep jónindegi keńestiń kezekti otyrysy ótti. Onda jaýapty sala basshylarynyń esepteri tyńdalyp, birqatar laýazymdy tulǵalardyń tártiptik isi qaraldy.

– Saýran aýdany ákimdiginiń Eski Iqan aýyldyq okrýginiń ákimi jer berý máselesinde quqyqqa syıymsyz qoldaý kórsetkeni, Saryaǵash aýdany Jarty tóbe aýyldyq okrýginiń ákimi, Saryaǵash aýdanynyń Qurylys, sáýlet jáne qala qurylysy bóliminiń basshysy jumys ýaqytynda dáleldi sebeptermen jumysta bolmaǵan qyzmetshilerine artyqshylyq kórsetip, eńbek jalaqysyn tolyq aýdaryp, memlekettik qyzmetke kir keltiretin teris qylyq jasaǵany úshin Ádep jónindegi keńes sheshimimen «qyzmetke tolyq sáıkes emestigi týraly eskertý» túrindegi tártiptik jaza qoldaný usynyldy, – delingen Memlekettik qyzmet isteri agenttigi Túrkistan oblysy boıynsha departamenti taratqan aqparatta.

Sondaı-aq Ádep kodeksi talaptaryn saqtamaǵany úshin Shardara aýdandyq Turǵyn úı-kommýnaldyq sharýashylyq, jolaýshylyr kóligi jáne avtomobıl joldary bólimi basshysynyń orynbasaryna «sógis» túrindegi tártiptik jaza qoldaný usynyldy.

Budan buryn Túrkistanda basqarma basshysy qatysqan tóbelestiń vıdeosy taraǵanyn jazǵan edik.