Túrkistanda tik drenajdardy qalpyna keltirýdegi kemshilikter egistikke zııan tıgizdi
TÚRKІSTAN. KAZINFORM — Búginde Jetisaı aýdanynda jalpy sany 380 dana tik drenajdy uńǵymanyń 170-i ǵana turaqty jumys istep tur.
Jetisaı aýdanynda tik drenajdardyń isten shyǵýynyń saldarynan jer asty sýy óz deńgeıinen joǵary kóterilip, egistik alqaptarda ónimniń sapasy men kólemi tómendegen. Jaýyn-shashynda sýdyń jerge sińýi qıyndap, turǵyndar úıirgelik jerlerine baý-baqsha egýden qalǵan.
2023 jyldyń qazan aıynda Sý resýrstary jáne ırrıgatsııa mınıstrligi «QazSýshar» RMK tapsyrysymen jáne «Islam Damý banki» qarjysy esebinen 210 dana tik drenajdy uńǵymasyn qaıta qalpyna keltirý jumystary qolǵa alynǵan bolatyn. Jobaǵa sáıkes, atalǵan jumystar 2026 jyldyń sáýir aıynda tolyq aıaqtalyp, el ıgiligine berilmek.
— Jospar aıasynda «KıikbaıStroıServıs» JShS arqyly Maqtaly, Qyzylqum jáne Abaı aýyldyq okrýgterinde 97 dana tik drenaj qalpyna keltirilip, 16 myń gektar alqaptyń melıoratıvtik jaǵdaıyn jaqsartý kózdelgen. Al «Art-Qurylys» JShS Eralıev, Yntymaq jáne Sh. Dildabekov aýyldyq okrýgterinde 113 dana tik drenajdy qaıta jańǵyrtyp, 20 myń gektar alqaptyń melıoratıvtik jaǵdaıyn jaqsartýdy maqsat etken. Alaıda qazirgi tańda merdigerler jumystardyń basym bóligin oryndaǵanymen, birqatar olqylyq anyqtaldy. Atap aıtqanda, turǵyndardyń eldimekenderge, sharýalardyń egistik alqaptarǵa kirip-shyǵýynda kedergiler týyndap, keıbir aýmaqtarda qashyrtqylardyń beti ashyq qalyp qoıǵan. Sonymen qatar avtojoldarǵa keltirilgen zalal joıylmaǵan, — delingen aýdan ákimdiginiń baspasóz qyzmeti taratqan aqparatta.
Osyǵan baılanysty aýdan ákimi Serik Mamytov merdigerlerge anyqtalǵan kemshilikterdi qysqa merzimde joıýdy qatań tapsyrdy. Sondaı-aq atqarylǵan jumystarǵa tıisti sala mamandarynyń qatysýymen zerdeleý júrgiziletinin eskertti. Sebebi merdiger kompanııalar jumysyna beriletin bir jyldyq kepildik merzimi ótkennen keıin anyqtalǵan aqaýlardy qalpyna keltirý múmkin bolmaı qalýy yqtımal.
Budan buryn Túrkistan oblysynda 700-den astam tik drenaj uńǵyma qalpyna keltiriletinin jazǵan edik.