Túrkistanda tigilgen alyp sáýkele Qazaqstannyń rekordtar kitabyna endi
TÚRKІSTAN. KAZINFORM — Túrkistanda tigilgen eń úlken sáýkele Qazaqstannyń rekordtar kitabyna endi. Biregeı eksponat 30-dan astam túrki halyqtarynyń oıý-órnekterimen bezendirilgen.
Áıelderge arnalǵan ulttyq bas kıimniń bıiktigi 5 metrden asady, al syrtyn kómkerip jaýyp turǵan matasynyń uzyndyǵy — 600 metr. Sáýkele halyqaralyq «Global Book of Records» rekordtar kitabyna enip, arnaıy sertıfıkat tabystaldy.
Tarıhı sáttiń kýási bolý úshin Túrkistanǵa Qazaqstannyń rekordtar kitabynyń resmı ókili Qýandyq Qudaıbergenov arnaıy kelip, sáýkeleniń rekordtyq mártebesin resmı túrde jarııalady. Sharaǵa elimizdiń túkpir-túkpirinen kelgen 1000-nan asa ana qatysyp, dástúrdi dáriptedi.
Sheber Aqmaral Daýylbaevanyń aıtýynsha, ulttyq bas kıim — bul kıimniń elementi ǵana emes, halyq birligi men rýhanı sabaqtastyqtyń aınasy.
— Sáýkelemizdiń bıiktigi kókpen talasyp, shyńmen tiresip tursyn dedik. Sondyqtan ony 5 metr 20 santımetr etip jasadyq. Al, oıý-órnegin tereń maǵynamen kómkerýdi jón kórip, sáýkeleniń keıpinen Jer ananyń beınesin jasadyq. Bir qolymen álemdi, bir qolymen besikti terbetken ana — ómirdiń máńgiligin, tirshiliktiń túp-tamyryn bildiredi. Sol sebepti oıýyn ómir aǵashy beınesinde órnektedik, — dedi joba avtory.
Budan buryn Túrkistan oblysynda Amır, Safııa, Hadııa esimdi úshem dúnıege kelgenin jazǵan edik.
Budan buryn Astanada Óner mýzeıi ashylǵanyn jazǵan edik.