Túrkistanda sýpermarketten merzimi ótken balalar taǵamy anyqtaldy

ASTANA. KAZINFORM – Túrkistan qalasynda «Jańa adamdar» qozǵalysynyń belsendileri «Qazyna» sýpermarketinde merzimi ótken taýarlardyń satylyp jatqanyn anyqtady.

«Merzimi ótken» azamattyq naýqany aıasyndaǵy reıd barysynda sórelerden sút ónimderi, nan-toqash, sondaı-aq jaramdylyq merzimi bir jyldan asyp ketken balalar taǵamy men shyryndar tabyldy. Barlyǵy úsh arba merzimi ótken taýar jınaldy.

Uıymdastyrýshylardyń aıtýynsha, ákimshilikpen kelissóz júrgizý áreketi janjalǵa ulasqan. Qyzmetkerler aıqyn derekterdi joqqa shyǵaryp qana qoımaı, belsendilerge dóreki sózder aıtyp, fızıkalyq qysym kórsetken.

Belsendiler jaǵdaıǵa nazar aýdartý maqsatynda aktsııa ótkizip, dúken sórelerindegi merzimi ótken ónimderdi sımvoldyq art-nysan túrinde kórsetti. Olar tutynýshylardy jaramdylyq merzimine muqııat qaraýǵa jáne zań buzýshylyqtar týraly ashyq aıtýǵa shaqyrdy.

«Biz merzimi ótken taýarlardy joıýdy, sapany baqylaýdy jáne tutynýshylarǵa qurmetpen qaraýdy talap ettik. Biraq máseleniń túbiri – óz quqyqtaryn talap etpeıtin, únsiz kelisetin tutynýshylarda da jatyr. Tek belsendi azamattyq ustanym dúkenderdi tásilin ózgertýge májbúrleıdi», – dedi «Jańa adamdar» qozǵalysynyń ókili Jansaıa Meldehan.

Aıta keteıik, saýda draıverine aınalǵan Astanada bazar ınfraqurylymy jańartýdy qajet etedi.