Túrkistanda sýǵa batyp ketken 8 jasar bala tórt kúnnen beri izdestirilip jatyr
TÚRKІSTAN. KAZINFORM – Túrkistan oblysy Keles aýdanynda sýǵa ketken balany izdeý-qutqarý jumystary jalǵasyp jatyr.
Qutqarýshylardyń málimetinshe, TJM qutqarýshylary men jergilikti atqarýshy organdardyń kúshteri Keles ózenine batyp ketken 8 jasar balany izdeý-qutqarý jumystaryn júrgizip jatyr.
Anasynyń aıtýynsha, 23 naýryz kúni saǵat 17:00 shamasynda bala oıyn kezinde sýǵa qulap, batyp ketken.
– 2018 jyly týǵan balany izdeý-qutqarý jumystaryna Tótenshe jaǵdaılar departamentiniń qyzmetkerleri, polıtsııa, jergilikti atqarýshy organdar, sondaı-aq turǵyndar men týystary jumyldyryldy. Jalpy 120-dan astam adam, 15 tehnıka, 2 júzý quraly jáne 2 ushqyshsyz ushý aparaty tartylǵan, - dedi oblystyq TJD bastyǵynyń orynbasary, polkovnık Asqat Erjanov.
Qazirgi ýaqytta izdeý jumystary jalǵasyp jatyr.
– TJM sýdaǵy qaýipsizdik erejelerin saqtaýdy jáne balalardy qaraýsyz qaldyrmaýdy eskertedi, - dep naqtylady vedomstvo.
Budan buryn Túrkistan oblysynda ózen tasyp, 29 adam evakýatsııalanǵanyn jazǵan edik.
