Túrkistanda stýdentter arasynda HІІІ jazǵy Ýnıversıada bastaldy

ASTANA. KAZINFORM – 10 mamyr men 14 maýsym aralyǵynda Túrkistan qalasyndaǵy Halyqaralyq týrızm jáne meımandostyq ýnıversıtetinde elimizdiń joǵary oqý oryndarynyń bilim alýshylary arasynda XIII jazǵy Ýnıversıada ótedi.

— Jarysqa sporttyń 17 túrinen, atap aıtqanda, badmınton, ústel tennısi, basketbol, shahmat, taekvondo, toǵyzqumalaq, jeńil atletıka, karate-do, voleıbol, dzıýdo, erkin kúres, áıelder kúresi, grek-rım kúresi, qazaq kúresi, boks, júzý, fýtzal boıynsha 76 joǵary oqý ornynyń 4 000-nan astam bilim alýshysy, onyń ishinde toǵyzqumalaq jáne qazaq kúresi ulttyq sport túrleri boıynsha 600-den astam stýdent qatysady, — delingen Ǵylym jáne joǵary bilim mınıstrligi habarlamasynda.

Ýnıversıadanyń ashylý saltanaty 16 mamyrda «Túrkistan Arena» ortalyq stadıonynda, jabylýy 13 maýsymda «Olympic Center» sport kesheninde ótkiziledi. Sporttyq is-sharalar ýnıversıtet aýmaǵynda jáne Túrkistan qalasynyń zamanaýı mamandandyrylǵan sport keshenderinde uıymdastyrylyp, 800-den astam medal men 100-den asa kýbok sarapqa salynady.

Ýnıversıadanyń alǵashqy oıyndarynda toǵyzqumalaq pen ústel tennısi boıynsha jarystar bastaldy. Toǵyzqumalaq sporty boıynsha 32 joǵary oqý ornynan 192, ústel tennısi sporty boıynsha 26 joǵary oqý orynan 156 bilim alýshy qatysty.

Uıymdastyrýshylardyń aıtýynsha, sporttyq sharalardy iske asyrý stýdent jastar arasynda salaýatty ómir salty qaǵıdattaryn qalyptastyrýdy qamtamasyz etip, elimizde buqaralyq sport túrleriniń damýyna yqpal etedi.

Aıta ketelik búgin Astanada para dzıýdodan álem chempıonatynyń ashylý saltanaty ótti.