Túrkistanda Sport kúni keń kólemde atalyp ótip, úzdik komandalar marapattaldy
TÚRKІSTAN. KAZINFORM — Túrkistan qalasyndaǵy «Túrkistan Arena» stadıonynda «Sport kúni» merekesine oraı fýtboldan áýesqoı komandalar arasynda tuńǵysh ret Túrkistan oblysynyń chempıonaty uıymdastyryldy, dep habarlaıdy oblys ákiminiń baspasóz qyzmeti.
Chempıonat eki kezeńnen turdy. Alǵashqy kezeń aýyldyq okrýgter deńgeıinde ótkizilip, oǵan oblystyń barlyq aýdan-qalalarynan 186 komandadan 3300-ge jýyq fýtbolshy qatysty. Іrikteý kezeńinen súrinbeı ótken úzdikter ekinshi aınalymǵa joldama aldy. Munda 3 qala men 14 aýdannyń quramalary tórt aımaqqa bólinip, fınaldyq kezeńge beriletin joldama úshin baq synady.
Fınalǵa Maqtaaral, Qazyǵurt, Ordabasy aýdandary men Túrkistan qalasynyń komandalary shyqty. 19-21 tamyz kúnderi ótken sheshýshi oıyndardyń qorytyndysy boıynsha 1-oryndy Maqtaaral aýdanynyń komandasy jeńip alsa, 2-oryn Túrkistan qalasynyń fýtbolshylaryna buıyrdy. Al Ordabasy aýdanynyń quramasy 3-orynǵa turaqtady.
Jeńimpaz atanǵan Maqtaaral komandasy Qazaqstan Respýblıkasynyń kýbogyna joldama alyp, oblys namysyn qorǵaý múmkindigine ıe boldy.
Chempıonattyń jabylý saltanatynda Túrkistan oblysynyń ákimi Nuralhan Kósherov sportshylardy kásibı merekesimen quttyqtap, olarǵa medaldar men kýboktar tabystady.
— Bul mereke — kásibı sportshylar men bapkerlerge ǵana emes, barlyq sport jankúıerleri men salaýatty ómir saltyn ustanatyn árbir adam úshin aıtýly kún. Túrkistan óńiri — árqashan qazaq sportyna serpin bergen qasıetti aımaq. Biz jastarǵa qoldaý kórsetý arqyly el bolashaǵyn nyǵaıtamyz, — dedi oblys ákimi.
Sondaı-aq ol halyqaralyq jáne respýblıkalyq jarystarda top jarǵan sportshylardy jeke marapattap, óńir sportynyń jetistikterine toqtaldy.
— Bizdiń óńirimizden Olımpıada jeńimpazdary men júldegerleri Bekzat Sattarhanov, Muhtarhan Dildábekov, Sáken Bıbosynov, Jazıra Japparqul sııaqty esimderi álemge tanymal sportshylar shyqqan. KSRO-nyń eńbek sińirgen sport sheberi Ábdisalan Nurmahanov, Oktıabr Jarylqapov, Sabyr Rahımov, Haıys Aqqalıev sekildi dańqty tulǵalar búkil halyqqa sportpen shuǵyldanýǵa úlgi bola bildi. Aıtýly tulǵalardyń izin jalǵaǵan sportshylarymyz ósip keledi. Ulttyq sport túrlerinen de oblysymyzdyń sportshylary Kóshpendiler oıyndarynda 31 medal ıelenip, respýblıka boıynsha kósh bastady. Jyl basynan beri sportshylarymyz Álem, Azııa jáne Qazaqstan chempıonattarynda jalpy 1 122 medaldy jeńip aldy. Ulttyq qurama sapyna oblystan 766 sportshy endi. Bul kórsetkish ótken jylmen salystyrǵanda 150 sportshyǵa artyp otyr, — dedi Nuralhan Kósherov.
Búginde oblysta 92 148 adam sportpen júıeli túrde aınalysady, olarǵa 2 440 jattyqtyrýshy qyzmet kórsetedi.
Sporttyq ınfraqurylym da qarqyndy damýda. Túrkistanda «Túrkistan Arena», halyqaralyq tennıs ortalyǵy, «Muz saraıy» jáne Bekzat Sattarhanov atyndaǵy sport kesheni paıdalanýǵa berilgen. Óńirde taǵy 54 jańa sport nysanyn salý josparlanyp otyr, onyń ishinde halyqaralyq eskek esý arnasy men atshabar da bar.
Bul chempıonat — tek jarys emes, jastardyń sportqa degen qyzyǵýshylyǵyn arttyryp, jańa esimderdiń ashylýyna múmkindik bergen mańyzdy oqıǵa boldy. Oblys basshylyǵy aldaǵy ýaqytta da osyndaı jarystardy turaqty ótkizip turýdy josparlap otyr.