Túrkistanda ishimdiksiz ómir saltyn tańdaǵan aýyldar qatary tolyqty

ASTANA. KAZINFORM — Іshki ister mınıstrliginiń bastamasyn qoldap, salaýatty ómir saltyn ustanýǵa nıetti aýyldardyń qatary Túrkistan oblysynda artyp keledi, dep habarlaıdy Polisia.kz.

Qoǵamdyq kelisim men jaýapkershilikke negizdelgen bul úrdis qazirgi tańda óńirdegi 66 aýyldy qamtyp otyr. Jaqynda osy tizimge Tóle bı aýdanyna qarasty Zaǵambar, Alǵabas jáne Taǵaına aýyldary qosyldy.

— Zaǵambar aýylynda ózbekter de, qazaqtar da, jalpy alty myńnan astam halyq tatý-tátti ómir súredi. «Іshimdiksiz» aýyl atanyp otyrmyz. Óte qýanyshtymyz, — dedi Zaǵambar aýylynyń turǵyny Egizbaı Súttibaev.

Aýyl turǵyndarynyń aıtýynsha, ishimdikten bas tartý tek jeke bastyń ǵana emes, tutas qoǵamnyń densaýlyǵy men mádenıetine áser etedi. Qazirdiń ózinde mundaı aýyldarda qylmys deńgeıi nólge teń. Sonymen qatar qoǵamdyq tártip te edáýir jaqsaryp, jastardyń sportqa, bilimge degen yntasy arta túsken.

— Búgingi is-shara keleshekke kemeldengen aýyl degen atpen jasalyp jatyr. Alǵabas aýyly, Zaǵambar aýyly, Taǵaına aýyly keremet jobany qolǵa alyp otyr. Árıne, bul birinshi kezekte urpaq úshin, el úshin jasalyp jatqan izgi is. Balapandardyń bolashaǵy jarqyn bolsyn degen nıetpen adal aspen ómir súrip, salaýatty ómir saltyn ustanýǵa jol bastap, kósh bastaǵan eken aýyl turǵyndary, — dedi ánshi Altynaı Jorabaeva.

Mundaı jetistikke polıtsııa jumysynyń júıeli uıymdastyrylýy sebep boldy. Zań men tártip ornatýǵa umtylǵan elde osyndaı oń ózgerister júzege asady.

Buǵan deıin óńirdegi ishimdiksiz aýyldar qataryna Dermene, Tabysty, Jańajol, Nurtas, Mádenıet aýyldary qosylǵanyn jazǵan edik.