Túrkistanda sheneýnikter tsıfrlandyrýdan aqsha jasap, mıllıondaǵan somada para alǵan

TÚRKІSTAN. KAZINFORM — Túrkistan oblysy tsıfrlandyrý basqarmasy basshysy orynbasarynyń mindetin atqarýshy jemqorlyq úshin sottaldy

Shymkent qalasynyń qylmystyq ister jónindegi aýdanaralyq soty Túrkistan oblysy tsıfrlandyrý, memlekettik qyzmetter kórsetý jáne muraǵattar basqarmasy basshysy orynbasarynyń m. a. M. Myrzaseıitovke, osy basqarmanyń bólim basshysy A. Jolseıitovke jáne kásipker E. Isakovqa úkim shyǵardy.

2022 jyldyń tamyzynan 2023 jyldyń shildesine deıingi kezeńde memlekettik organdardy aqparattandyrý jáne tsıfrlandyrý jónindegi qyzmetterdi memlekettik satyp alý kelisimshartyn jasasqany, olar boıynsha atqarylǵan jumys aktisine qol qoıý úshin jalpy somasy 14,6 mln teńge bolatyn birneshe ret para alǵany jáne bergeni úshin, sonymen qatar Jolseıitov budan basqa — para berýge jáne alaıaqtyq jasaýǵa ıtermelegeni úshin kináli dep tanyldy.

Jolseıitov Tólebı aýdanynyń tsıfrlandyrý bóliminiń basshysy laýazymyna aýysqannan keıin osyndaı áreketterdi oryndaǵany úshin joǵary turǵan laýazymdy tulǵalarǵa berý syltaýymen Isakovtyń 903 myń teńge somasyndaǵy aqshalaı qarajatyn alaıaqtyq jolmen ıemdengeni anyqtaldy.

Atalǵan úkimmen Otyrar aýdany ákimi apparatynyń basshysy A. Máýlen konkýrstyń jeńimpazyn anyqtaǵany jáne aýdannyń aýyldyq okrýgterine IT qyzmetterdi memlekettik satyp alý kelisimshartyn jasaǵany úshin Isakovtan 5 mln teńge somasynda para alǵany úshin kináli dep tanyldy.

Sot úkimimen Myrzaseıitovke 8 jyl, Ysqaqovqa — 7 jyl, Jolseıitovke — 4 jyl merzimge bas bostandyǵynan aıyrý jazasy taǵaıyndaldy.

Sonymen birge atalǵan adamdar memlekettik qyzmette laýazymdardy atqarý quqyǵynan ómir boıy aıyryldy.

Sot Máýlenniń ólimine baılanysty oǵan qatysty qylmystyq qýdalaýdy toqtatty.

Úkim jarııalanǵan kezde oblystyq tsıfrlandyrý basqarmasy ujymy qatysyp otyrdy. 

Úkim zańdy kúshine engen joq.