Túrkistanda saılaýshylarǵa jaǵdaı jasaý úshin tsıfrlyq tehnologııalar qoldanylyp jatyr
TÚRKІSTAN. KAZINFORM – QR Ortalyq saılaý komıssııasynyń tóraǵasy Nurlan Ábdirov Túrkistan oblysyna keldi.
Sapardyń maqsaty – 2026 jylǵy 23 tamyzǵa josparlanǵan QR Quryltaıy depýtattaryn saılaýǵa daıyndyq jumystarynyń óńirde uıymdastyrylý barysymen tanysyp, jergilikti saılaý komıssııalaryna ádistemelik kómek kórsetý.
Sapar aıasynda Nurlan Ábdirov Túrkistan qalasyndaǵy №133 jáne №951, sondaı-aq Kentaý qalasyndaǵy №39 jáne №44 saılaý ýchaskeleriniń jumysymen tanysty. Aralaý barysynda ýchaskelerdiń materıaldyq-tehnıkalyq bazasy, daýys berý kabınalary men jáshikteriniń jaı-kúıi jáne qaýipsizdik talaptarynyń saqtalýy zerdelendi.
Sonymen qatar ýchaskelik saılaý komıssııalarynyń múshelerimen kezdesip, saılaýshylar tizimderin naqtylaý, saılaý bıýlletenderin qabyldaýǵa daıyndyq jáne turǵyndarmen tıimdi baılanysty uıymdastyrý jumystarynyń barysyn talqylady.
Tóraǵa saılaý kúni azamattarǵa, ásirese qarttar men múgedektigi bar adamdarǵa qolaıly jaǵdaı jasaýdyń mańyzdylyǵyna erekshe toqtalyp, tıisti tapsyrmalar berdi.
Sondaı-aq Nurlan Ábdirov memlekettik organdar men aýmaqtyq saılaý komıssııalarynyń ókilderiniń qatysýymen arnaıy keńes ótkizdi.
Keńeste saılaý protsesiniń ashyqtyǵy men zańdylyǵyn qamtamasyz etý máseleleri qaralyp, árbir aýmaqtyq komıssııa tóraǵasyna saılaýshylardyń konstıtýtsııalyq quqyqtaryn tolyq iske asyrý úshin barlyq qajetti sharalardy ýaqytyly qabyldaý tapsyryldy. Sonymen qatar saılaý ýchaskelerin qajetti tehnıkalyq qural-jabdyqtarmen jáne turaqty ınternet jelisimen qamtamasyz etý máseleleri qaraldy.
Túrkistan oblystyq aýmaqtyq saılaý komıssııasynyń málimetinshe, búginde óńirde 2 mıllıonnan astam turǵyn bar. Onyń ishinde 1 204 659 azamattyń daýys berý quqyǵy bar, bul – óńir halqynyń 56 paıyzy. Saılaýdy sapaly uıymdastyrý maqsatynda oblysta 18 aýmaqtyq jáne 952 ýchaskelik saılaý komıssııasy jumys isteıdi.
– Óńirde demografııalyq ósim artyp, jańa turǵyn úılerdiń kóptep salynýyna baılanysty bıyl Túrkistan qalasynda úsh jáne Saýran aýdanynda bir jańa saılaý ýchaskesi ashylyp, alty saılaý ýchaskesiniń shekarasy qaıta qaraldy. Qazirgi ýaqytta barlyq 952 saılaý ýchaskesi qajetti materıaldyq-tehnıkalyq quraldarmen tolyq qamtamasyz etilgen, – dep habarlady oblystyq aýmaqtyq saılaý komıssııasy.
Sonymen qatar saılaýshylarǵa qolaıly jaǵdaı jasaý maqsatynda tsıfrlyq tehnologııalar da keńinen qoldanylyp jatyr. Oblys ákimdiginiń ınternet-resýrsynda «Óz saılaý ýchaskeńizdi tabyńyz» onlaın servısi iske qosylǵan. Saılaý kúni bul múmkindik 557 ýchaskede qoljetimdi bolady. Sondaı-aq azamattar ózderiniń saılaýshylar tizimine engizilgenin eGov portaly arqyly teksere alady. Budan bólek turǵyndarǵa qyzmet kórsetý úshin 22 shaǵyn HQKO, 18 jergilikti Call-ortalyq jáne «109» biryńǵaı baılanys ortalyǵy táýlik boıy jumys isteýge daıyn.
Qazirgi ýaqytta komıssııa músheleri saılaýshylarǵa arnaıy shaqyrý qaǵazdaryn taratý jumystaryn júrgizip jatyr. Bul naýqan 7-12 tamyz aralyǵyn qamtıdy.
– Halyqty aqparattandyrý maqsatynda óńirdegi 16 saýda ortalyǵyndaǵy 215 teledıdarda, 45 medıtsınalyq uıymda jáne HQKO-larda aqparattyq beınerolıkter kórsetilip jatyr. Sonymen qatar bazarlar men temirjol vokzaldarynda aýdıorolıkter taratylyp, qoǵamdyq tamaqtaný oryndarynda 4200 ınfobanner ornalastyryldy. Halyq kóp qatynaıtyn 150 avtobýstyń tutqalaryna arnaıy aqparattyq japsyrmalar ilindi, – delingen oblystyq aýmaqtyq saılaý komıssııasynyń málimetinde.
Buǵan deıin Túrkistan oblysynda erekshe qajettiligi bar 14 873 saılaýshy tirkelgeni týraly habarlaǵan edik.
