Túrkistanda salynyp jatqan joldardan kemshilikter anyqtaldy

TÚRKІSTAN. KAZINFORM — Jol sapasyna saraptama jasaýdyń jańa tártibi engizildi. 

Ulttyq sapa ortalyǵynyń ınjenerleri men zerthanashylary Túrkistan qalasynda jańadan salynyp jatqan 13 kósheden 9 aqaý anyqtaǵan. Alaıda, bul kemshilikterdiń birde-bireýi joıylmaǵan. Merdigerler qurylys materıaldaryn da durys iriktemegen. Sondaı-aq, mamandar qaladaǵy qurylys nysandaryna 17 ret baryp, 93 synama alǵan. Nátıjesinde olardyń 35 paıyzy talapqa saı bolmaı shyqqan.

— Endi tapsyrys berýshiler men merdigerler mundaı eskertýlerdi eleýsiz qaldyra almaıdy. Sebebi, jańadan salynǵan joldar Ulttyq sapa ortalyǵynyń qorytyndy esebinsiz paıdalanýǵa berilmeıdi. Jergilikti ákimdik ár nysannyń saraptamadan ótýin qamtamasyz etýge mindetti. Bul talaptar tapsyrys berýshilerdiń qyzmeti men mindetin naqtylaıtyn Úkimettiń buıryǵyna engizilgen ózgeristerde kórsetilgen, — delingen Ulttyq sapa ortalyǵynyń Túrkistan fılıaly taratqan aqparatta.

Túrkistan qalasy ákimdiginde ótken jıynda ortalyqtyń qyzmetin retteıtin, sondaı-aq saraptama túrleri men kólemin, merzimin belgileıtin qujat tanystyryldy. Onda ortalyqtyń bólim basshysy Qaırat Shákirov qaladaǵy sala mamandaryna jańa tártip pen talaptardy túsindirdi.

Aıta keteıik, budan buryn Túrkistanda kópqabatty úılerde tártip buzǵandarǵa aıyppul salynatyndyǵyn jazǵan bolatynbyz.