Túrkistanda sabaq ústinde kóz jumǵan oqýshy oqıǵasyna qatysty tergeý aıaqtaldy

TÚRKІSTAN. KAZINFORM — Qazyǵurt aýdanynda 12 jastaǵy oqýshy sabaq ústinde qaıtys boldy. Bul jaǵdaı qoǵamda úlken alańdaýshylyq týdyrdy.

Oqıǵa 7 aqpan kúni Qazyǵurt aýdanyndaǵy mektepterdiń birinde boldy. Áleýmettik jelilerde taraǵan keı aqparatqa súıensek, sabaq kezinde synypta muǵalim bolmaǵan sátte eki oqýshynyń arasynda túsinbeýshilik týyndaǵan. Alaıda bul derek resmı túrde rastalǵan joq.

Sot-medıtsınalyq saraptama qorytyndysy boıynsha oqýshynyń ólimi tynys alý joldarynyń jabylyp, tildiń kómeıge túsýinen, ıaǵnı asfıksııa saldarynan bolǵan.

— Máıitten qandaı da bir zorlyq-zombylyq, uryp-soǵý nemese tunshyǵý belgileri tabylǵan joq. Atalǵan fakti boıynsha Qylmystyq kodekstiń 141-baby 2-bóligimen («Balalardyń ómiri men densaýlyǵynyń qaýipsizdigin qamtamasyz etý jónindegi mindetterdi tıisinshe oryndamaý») qylmystyq is qozǵaldy. Tergeý barysynda kýálar men muǵalimderden jaýaptar alynyp, beıne jazbalar zertteldi. Qosymsha saraptamalar taǵaıyndalyp, barlyq dálel jan-jaqty qarastyryldy. Tergeý nátıjesinde oqýshynyń densaýlyǵy kúrt nasharlap, medıtsınalyq mekemege jetpeı jolda kóz jumǵany anyqtaldy, — delingen Túrkistan oblysy polıtsııa departamenti usynǵan aqparatta.

Sonymen qatar, bul oqıǵaǵa sebep bolýy múmkin mán-jaılardy joıý maqsatynda aýdandyq ákimdikke tıisti usynys engizilgen. Usynysty qaraý qorytyndysy boıynsha mektep dırektory men bes pedagog qyzmetinen bosatyldy.

— Tergeý nátıjesi boıynsha ólimniń qylmystyq sıpaty anyqtalmady jáne qylmystyq quqyq buzýshylyq quramynyń bolmaýyna baılanysty qylmystyq is toqtatyldy. Toqtatý týraly bekitilgen qaýlyny prokýror tekserip, qabyldanǵan sheshimniń zańdylyǵyn qarap shyqty, — delingen vedomstva aqparatynda. 

Aıta keteıik, budan buryn Shymkent zoobaǵynda túıequsty tepken er adam izdestirilip jatqanyn jazǵan bolatynbyz.