Túrkistanda Respýblıka kúnine arnalǵan «Qyran elim - Qazaqstanym» atty is-shara ótti
TÚRKІSTAN. KAZINFORM - Túrki áleminiń rýhanı astanasy – Túrkistan qalasynda 25 qazan – Respýblıka kúnine arnalǵan «Qyran elim – Qazaqstanym!» atty saltanatty is-shara ótti.
Merekelik is-sharaǵa qatysýshylar aldymen Alash qaıratkerleriniń otty oılaryn tyńdap, óńir ónerpazdarymen birge Qazaqstan Respýblıkasynyń Memlekettik Ánuranyn shyrqady.
Mańyzdy is-sharaǵa qatysqan Túrkistan oblysynyń ákimi Nuralhan Kósherov jurtshylyqty aıtýly merekemen quttyqtap, óńirdiń damýyna eleýli úles qosyp kele jatqan bir top azamatty marapattady.
– Sizderdi Respýblıka kúnimen shyn júrekten quttyqtaımyn! Bul – halqymyzdyń san ǵasyrlyq armany oryndalǵan kún. 1990 jyldyń 25 qazanynda qabyldanǵan Deklaratsııa – elimizdiń erkindikke jasaǵan alǵashqy naqty qadamy. Búginde biz álemge táýelsiz, beıbit, birtutas jáne damýshy memleket retinde tanyldyq. Eldigimiz anyqtalyp, shekaramyz belgilendi. Jarqyn bolashaqqa senimmen qadam basyp kelemiz. Bul – birlik pen parasattyń jeńisi.
El Prezıdenti Qasym-Jomart Kemeluly bıylǵy Joldaýynda el damýynyń jańa basymdyqtaryn aıqyndady. Tsıfrlyq damý, ınvestıtsııa tartý, ekonomıkany ártaraptandyra otyryp, shıkizattyq sektordan tereń óńdeýdi damytýdy tapsyrdy. Memlekettik basqarý, bilim berý men densaýlyq saqtaý júıesin jasandy ıntellekt arqyly jańǵyrtýdy júktedi. Sonymen birge tsıfrlyq tehnologııalardy agroónerkásip pen óńirlik ekonomıkaǵa engizý mindetin de júktep otyr. Osyǵan sáıkes Túrkistan oblysynda da naqty sharalar qolǵa alyndy.
Bizdiń basty maqsatymyz – halyqtyń ómir súrý sapasy men ál-aýqatyn arttyrý. Búginde Túrkistan tek kıeli shahar ǵana emes, strategııalyq mańyzdy óńirge aınaldy. Bizdiń aldymyzda turǵan mindet – osy tarıhı múmkindikti tolyq paıdalanyp, Túrkistandy tek oblys ortalyǵy ǵana emes, el ekonomıkasyna serpin beretin aımaqqa aınaldyrý. Bul úshin biz birligimizdi bekemdep, eldik múdde jolynda jumyla eńbek etýimiz qajet. Elimiz aman, jurtymyz tynysh, Túrkistanymyz nurly bolsyn! – dedi Nuralhan Oralbaıuly.
Saltanatty is-sharada oblys ákimi Nuralhan Kósherov eńbegimen daralanǵan eńbek adamdary men memleketti damytýǵa úles qosyp júrgen qaıratker azamattardy marapattady. Atap aıtqanda, «Parasat», «Qurmet» ordenderi men «Eren eńbegi úshin», «Shapaǵat» medaldaryn tapsyrdy.
Marapattalǵandardyń qatarynda eńbek ardagerleri, muǵalimder men dárigerler, mádenıet jáne bıznes ókilderi, baqtashylar men mashınıster bar. Sonymen qatar saltanatty sharada oblys ákimi Nuralhan Kósherov Memlekettik qyzmet isteri agenttiginiń Tóraǵasy Darhan Jazyqbaıdyń «Memlekettik qyzmet ardageri» tósbelgisimen Maqtaaral aýdanynyń ákimi Asanov Baqyt Nasyrhanulyn marapattady.
Memleket basshysy halyqqa bıylǵy Joldaýynda ınvestıtsııa tartý júıesin jańǵyrtýdy tapsyrǵan bolatyn. Oblysta qolaıly ınvestıtsııalyq klımat qalyptasqan. Oblys ekonomıkasynyń damýyna tyń serpin beretin jalpy quny 2,6 trln. teńgeni quraıtyn 111 ınvestıtsııalyq joba pýly qalyptasty. Negizgi baǵyttary – óńdeý, energetıka jáne aýyl sharýashylyǵyn tereń qaıta óńdeý. Jobalardy tolyq iske asyrý nátıjesinde 24 myńǵa jýyq jańa jumys orny ashylyp, bıýdjetke qosymsha 100 mlrd. teńge salyq túsedi. Bıyl 332 mlrd. teńgege 57 jobany iske asyryp, 8 174 jumys ornyn ashý josparlanǵan. 9 aıda 33 joba iske qosylyp, 4793 jumys orny ashyldy. Atqarylǵan jumystardyń nátıjesinde 9 aıda óńir ekonomıkasyna 1 trln. teńge ınvestıtsııa baǵyttalyp, 115,9%-ǵa ósti.
Memleket basshysy el damýynyń negizgi sektory – qýatty ónerkásip áleýetine negizdelgen jáne ártaraptandyrylǵan ekonomıkany qurý qajettiligin aıqyndap ótti. Óńirdiń ındýstrıalızatsııa áleýetin damytý maqsatynda 20 ındýstrıaldy jáne 3 arnaıy ekonomıkalyq aımaqtar, shaǵyn ónerkásiptik park qurylǵan. Indýstrıaldyq aımaqtarda quny 152 mlrd. teńgeni quraıtyn 98 ınvestıtsııalyq joba iske asyrylýda.
Jalpy ónerkásip salasynda atqarylǵan sharalardyń esebinen 9 aıda 1,1 trln. teńgege ónerkásip ónimi óndirilip, ósim 113,5%-ǵa jetti. Óńir ekonomıkasynyń mańyzdy salasy aýyl sharýashylyǵynda ónim 855 mlrd. teńgeni qurap, ósim 101,5% deńgeıinde oryn aldy. Óndirilgen ónim boıynsha Túrkistan oblysy –respýblıkada kóshbasshy.
Prezıdent 2025 jyly jalpy ekonomıkanyń 7% ósimin qamtamasyz etýdi tapsyrǵan bolatyn. Osy mejege jetý jolynda óńirde aıtarlyqtaı ilgeri qadam jasap keledi. Osy jyldyń 9 aıynyń qorytyndysymen oń dınamıka baıqalady. Qysqa merzimde ekonomıkalyq ósim 114,8%-ǵa jetti. Bul – respýblıkadaǵy joǵary kórsetkishterdiń biri. Barlyq negizgi makroekonomıkalyq kórsetkishterdiń oń ósimine qol jetkizildi.
Saltanatty is-shara merekelik kontsertke ulasty. Oblys ónerpazdary kópshilikke kóterińki kóńil-kúı syılap, myń buralǵan bıshiler ónerimen tánti etti. Atap aıtqanda, Saıa Mahambet, «Abyroı» toby, ázirbaıjandyq Leıla Alıeva, Rýslan Aqynbekov jáne ózge de ánshiler rýhty kóteretin ánder shyrqap, Respýblıka kúniniń mánin asha tústi.