Túrkistanda referendým kúni qoǵamdyq kólikter tegin júredi

TÚRKІSTAN. KAZINFORM — 15 naýryzda ótetin respýblıkalyq referendým kúni Túrkistan qalasynda qoǵamdyq kólikter tegin qyzmet kórsetedi.

Qala ákimdiginiń málimetinshe, bul shara turǵyndardyń mańyzdy saıası naýqanǵa qatysýyna qolaıly jaǵdaı jasaý maqsatynda uıymdastyrylyp otyr.

— Referendým kúni qala turǵyndary men qonaqtary qoǵamdyq kólikterdi aqysyz paıdalana alady. Tegin jol júrý múmkindigi qaladaǵy barlyq avtobýs baǵyttaryna qatysty bolady. Osylaısha turǵyndar referendým ýchaskelerine esh kedergisiz jetip, óz tańdaýlaryn jasaýǵa múmkindik alady, — dep habarlady qala ákimdigi.

Túrkistan qalasynda barlyǵy 65 referendým ýchaskesi jumys isteıdi. Jalpy shaharda 134 094 daýys berýshi tirkelgen.

Referendým ýchaskeleri qalanyń ártúrli nysandarynda uıymdastyrylǵan. Atap aıtqanda, 44 ýchaske jalpy bilim beretin mektepterde, 7 ýchaske ýnıversıtetter men kolledjderde jáne oqýshylar saraıynda, 3 ýchaske sport mektepterinde, 4 ýchaske JShS ǵımarattarynda, 6 ýchaske balabaqshalarda, al 1 ýchaske aýrýhanada ornalasqan.

Budan buryn Túrkistan oblysynda 1,2 mln-ǵa jýyq azamat referendýmda daýys bere alatynyn jazǵan edik.