Túrkistanda polıtsııa kapıtany qyzmettik mindetin atqarý kezinde qaza tapty
TÚRKІSTAN. KAZINFORM — Túrkistan qalasynda qyzmettik mindetin atqarý barysynda patrýldik polıtsııa qyzmetkeri jol-kólik oqıǵasynan kóz jumdy.
Oblystyq polıtsııa departamentiniń málimetine súıensek, 2 shilde kúni Túrkistan qalasy Polıtsııa basqarmasy patrýldik polıtsııa batalonynyń aǵa ınspektory, polıtsııa kapıtany Baýyrjan Qonysbekov qyzmettik mindetin atqarý kezinde qaıǵyly oqıǵaǵa ushyraǵan.
Aldyn ala málimet boıynsha, patrýldik polıtsııa ekıpajy jol qozǵalysy erejelerin óreskel buzyp, ózge jol qozǵalysyna qatysýshylarǵa qaýip tóndirgen jeńil avtokólikti toqtatýǵa baǵyttalǵan.
Sattarhanov dańǵyly men Taraz kóshesiniń qıylysynda patrýldik polıtsııanyń Chevrolet Cobalt qyzmettik avtokóligi jol-kólik oqıǵasyna túsken. Saldarynan polıtsııa kapıtany Baýyrjan Qonysbekov aýyr jaraqattanyp, oqıǵa ornynda kóz jumdy.
— Atalǵan derek boıynsha sotqa deıingi tergep-tekserý bastaldy. Qazirgi ýaqytta oqıǵanyń barlyq mán-jaıyn jan-jaqty ári obektıvti anyqtaýǵa baǵyttalǵan qajetti tergeý jáne jedel-izdestirý is-sharalary júrgizilip jatyr. Tergep-tekserý nátıjesi boıynsha qoldanystaǵy zańnama talaptaryna sáıkes protsessýaldyq sheshim qabyldanady, — delingen habarlamada.
Áleýmettik jelide polıtsııa kóligin soqqan júrgizýshiniń saǵatyna 180 shaqyrym jyldamdyqpen kele jatqany, oǵan beınebaqylaý qyzmeti, jol polıtsııasy qaıǵyly jaǵdaıǵa jetkizbeý úshin esh shara qoldanbaǵany týraly málimet taraǵan bolatyn. Túrkistan oblystyq polıtsııa departamentiniń baspasóz qyzmeti bul málimetti joqqa shyǵardy.
Qazaqstan Respýblıkasy Іshki ister mınıstrligi, Túrkistan oblysy Polıtsııa departamenti jáne ishki ister organdarynyń jeke quramy marqumnyń týǵan-týystary men jaqyndaryna kóńil aıtyp, qaıǵysyna ortaqtasty.
Vedomstvo málimetinshe, tártip saqshysy antqa adal bolyp, qyzmettik boryshyn sońyna deıin abyroımen atqarǵan.
Budan buryn CQO-daǵy jol apatynan eki polıtseı kóz jumǵany týraly habarlaǵan edik.
