Túrkistanda polıetılen qaptama ónimderin jáne skotch óndiretin zaýyt ashyldy
ASTANA. KAZINFORM – Túrkistan qalasynda polıetılen qaptama ónimderin jáne skotch óndiretin jańa zaýyt óz jumysyn bastady. «QazEcoPack» JShS-nyń skotch shyǵaratyn óndiris jelisi iske qosylyp, alǵashqy ónimder óndirile bastady.
Zaýyttyń ashylý rásimine Túrkistan oblysynyń ákimi Nuralhan Kósherov qatysyp, kópshilikti quttyqtady.
— Aldymen barshańyzdy qasıetti Ramazan aıynyń bastalýymen quttyqtaımyn. Memleket basshysy Qasym-Jomart Kemeluly Toqaev Úkimekttiń keńeıtilgen otyrysynda ekonomıkany ártaraptandyrý, óńdeý ónerkásibin damytý, ekonomıkanyń naqty sektoryn kúsheıtý jáne jańa jumys oryndaryn qurý jóninde tapsyrma berdi. Óńirimizde osy baǵytta jumys jalǵasýda. Búgin biz Túrkistan oblysynyń damýy úshin mańyzdy oqıǵanyń kýási bolyp otyrmyz. «TURAN» arnaıy ekonomıkalyq aımaǵy aýmaǵynda jańa zaýyt ashylyp, jumys oryndary quryldy. Biz úshin árbir óndiris orny men joba mańyzdy. «QazEcoPack» kompanııasy jobasynyń iske qosylýy oblystyń áleýmettik-ekonomıkalyq damýyna tyń serpin berip, otandyq ónimdermen qamtamasyz etý kólemin arttyrýǵa jáne halyqtyń ál-aýqatyn kóterýge óz septigin tıgizedi. Osy bastamany júzege asyrǵan Halmet Dýman aǵamyz ben kásiporyn ujymyna sáttilik jáne tabys tileımin, — dedi Nuralhan Kósherov.
Zaýyt quryltaıshysy ári dırektory Dýman Halmet ınvestıtsııalyq jobany júzege asyrýǵa qoldaý kórsetken oblys ákimdigine alǵysyn bildirip, «TURAN» arnaıy ekonomıkalyq aımaǵynyń usynǵan múmkindikteri men kómegine rıza ekenin jetkizdi.
Kompanııa bastapqy jáne qaıta óńdelgen shıkizattan polıetılen qaptama ónimderin óndirýge baǵyttalǵan óndiristik jobany kezeń-kezeńimen júzege asyryp jatyr. Kásiporyn otandyq naryqty sapaly ónimmen qamtyp, ımport kólemin azaıtýǵa jáne qaıta óńdeý úlesin arttyrýǵa úles qosýdy kózdeıdi.
Joba úsh kezeń boıynsha júzege asyrylady. Sonyń birinshi kezeńi iske qosyldy. Bul zaýytta jylyna 1 500 000 dana skotch óndiriledi. Ónimder Qazaqstan men TMD elderine jetkiziledi.
Al ekinshi kezeń 2026 jyldyń jeltoqsanynda júzege asyp, jylyna 350 000 keli streıch-plenka jáne 80 000 dana aýa-kópirshikti plenka shyǵarý josparlanǵan. Úshinshi kezeń 2027 jyly iske asyrylyp, jylyna 500 000 keli polıetılen ónimderi óndiriledi dep kútilip otyr.
Kásiporynnyń jumysyn bastaýy óńirde jańa jumys oryndaryn ashýǵa múmkindik berdi. Birinshi kezeńde 20 adam jumyspen qamtyldy. Al aldaǵy kezeńderde taǵy da jumys oryndary qurylmaq.
Jobanyń jalpy quny — 1,21 mlrd teńge. Qazirgi ýaqytta 1440 m² aýmaqtaǵy óndiristik ǵımarat paıdalanýǵa berilip, jumysqa kiristi. Aldaǵy ýaqytta qosymsha 5 760 m² aýmaqta taǵy 4 ǵımarat salý josparlanǵan.