Túrkistanda Ózbekstanmen birlesip ashylǵan kooperatsııa 185 mlrd teńge ınvestıtsııa tartady
ASTANA. KAZINFORM — Ózbekstanmen júrgizilgen kelissózder nátıjesinde Túrkistan oblysynda 100 gektar aýmaqta «Ortalyq Azııa halyqaralyq kooperatsııa ortalyǵy» quryldy. Jańa ortalyq jumysy týraly Túrkistan oblysynyń ákimi Nuralhan Kósherov aıtyp berdi.
Prezıdent óz Joldaýynda Ortalyq Azııa elderimen ekonomıkalyq baılanysty kúsheıtýdi tapsyrǵan bolatyn.
— Jańa nysan zamanaýı qoımalar jáne óndiristik nysandarmen ıntegratsııalanǵan logıstıkalyq ortalyq qyzmetin atqarady. Ortalyqta 7 ınvestor jobalardy júzege asyrýǵa qyzyǵýshylyq tanytyp otyr. Nátıjesinde óńir ekonomıkasyna 185 mlrd teńge ınvestıtsııa tartylyp, 1 175 jumys orny ashylady dep kútilip otyr. Bıýdjetke 355 mln teńge qosymsha salyq túsedi, — dedi N. Kósherov elordada Ortalyq kommýnıkatsııalar qyzmetinde ótken brıfıngte.
Qazirgi ýaqytta 8 óndiristik ǵımarattar salynyp, ishki ınfraqurylym júıeleriniń qurylysy júrip jatyr. Bul ǵımarattar keler jyly iske qosylady.
Jalpy ónerkásip salasynda bıyl 107 mlrd teńgege 22 joba iske asyrylyp, 2 443 jumys orny ashylǵan. Onyń ishinde Sozaq aýdanynda tabıǵı ýran óńdeý kesheni, Otyrar aýdanynda — 2 maqta óńdeý zaýyty, Túlkibas aýdanynda — sýsyn shyǵaratyn zaýyt, Saıram aýdanynda — zamanaýı et kombınaty jáne Ordabasy aýdanynda — alıýmınıı buıymdaryn shyǵaratyn zaýyt bar.
Buǵan deıin Túrkistan oblysynyń ákimi ımportty almastyratyn 20 joba iske asyrylyp jatqanyn aıtqan edi.