Túrkistanda ótken jıynda zııaly qaýym ókilderi Ata zańnyń jańa jobasyna qoldaý bildirdi
TÚRKІSTAN. KAZINFORM – Túrkistan qalasyndaǵy «Dostyq» úıinde «Ádiletti Konstıtýtsııa – qýatty memleket» taqyrybynda dóńgelek ústel ótti.
Іs-sharanyń maqsaty – konstıtýtsııalyq reformalardyń mańyzyn talqylaý, qoǵamdaǵy quqyqtyq mádenıetti arttyrý jáne ádiletti qoǵam qurý máseleleri boıynsha pikir almasý.
Jıynǵa memlekettik organdardyń ókilderi, qoǵam qaıratkerleri, ǵalymdar men zııaly qaýym ókilderi qatysty. Dóńgelek ústeldi Túrkistan oblystyq máslıhatynyń tóraǵasy, Konstıtýtsııalyq reforma jónindegi komıssııanyń múshesi Nuraly Ábishov júrgizip otyrdy.
Túrkistan oblysynyń ákimi Nuralhan Kósherov óńirdiń áleýmettik-ekonomıkalyq damýy men memlekettik saıasatty júzege asyrýdaǵy zań ústemdiginiń mańyzyna toqtaldy.
– Ózderińizge málim, Prezıdentimiz Qasym-Jomart Kemeluly Toqaevtyń Jarlyǵyna sáıkes, 15 naýryzda jańa Konstıtýtsııaǵa arnalǵan respýblıkalyq referendým ótedi. Bul – Egemen elimizdiń bolashaǵy jolynda jasalyp jatqan mańyzdy qadam. Konstıtýtsııalyq reforma – elimizdiń saıası jańǵyrýyna, azamattardyń quqyqtary men bostandyqtaryn kúsheıtýge, qoǵam men memleket arasyndaǵy ózara senimdi nyǵaıtýǵa baǵyttalǵan. Bul – «Halyq únine qulaq asatyn memleket» tujyrymdamasynyń is júzindegi jarqyn kórinisi. Jańa Konstıtýtsııalyq model arqyly biz Ádiletti Qazaqstannyń irgetasyn qalaımyz. Jańa zańda adam qundylyǵy artyp, «Adam memleket úshin emes, memleket adam úshin» qaǵıdaty basty orynǵa shyǵady. Áleýmettik jaýapkershilik kúsheıip, memlekettiń halyq aldyndaǵy mindetteri keńeıedi, teńsizdikti azaıtý tetikteri bekitiledi. Bilim, ǵylym jáne ınnovatsııa eldigimizdiń basty ıdeologııasy retinde aıqyndalady. Tártip pen ádildik, ıaǵnı zań ústemdigi men tabıǵatqa uqypty qaraý alǵash ret konstıtýtsııalyq deńgeıde bekitilmek. Ádiletti konstıtýtsııa – qýatty memleketimizdiń berik dińgegi. Sondyqtan barshańyzdy 15 naýryz kúni ótetin referendýmǵa belsene qatysýǵa shaqyramyn. Bul – elimizdiń taǵdyryn aıqyndaıtyn, árbir azamattyń bolashaqqa tikeleı úles qosýyna jol ashatyn tarıhı múmkindik, - dedi Nuralhan Kósherov.
Jıyn barysynda Túrkistan oblystyq Qazaqstan halqy Assambleıasy janyndaǵy Analar keńesiniń tóraıymy Gúlsara Toqqulova sóz sóılep, qoǵamdaǵy birlik pen otbasy qundylyqtarynyń mańyzyna nazar aýdardy. Túrkistan oblysy Ádilet departamentiniń basshysynyń orynbasary Nurlan Erbekeshov Konstıtýtsııalyq reformalardyń quqyqtyq júıeni jetildirýdegi róli týraly aıtty.
Aıtysker-aqyn Bekarys Shoıbekov jáne ózge de zııaly qaýym ókilderi sóz sóılep, el damýy jolyndaǵy rýhanı qundylyqtar men ulttyq sananyń mańyzy týraly oı bólisti.
Dóńgelek ústel sońynda qatysýshylar Konstıtýtsııalyq reformalardyń qoǵamdy jańǵyrtýdaǵy mańyzyn atap ótip, quqyqtyq memleket qurý jolyndaǵy bastamaǵa qoldaý bildirdi.
