Túrkistanda ótken marafonǵa álemniń 40 elinen kelgen áýesqoı sportshylar qatysty
TÚRKІSTAN. KAZINFORM - Búgin «Turkistan Marathon – 2024» marafony ótti. Ony Túrkistan oblysy ákimdigi men Túrkistan qalasy ákimdiginiń qoldaýymen «Birinshi bolý – batyldyq» korporatıvtik qory uıymdastyrdy.
Jarys Visit Turkistan aýmaǵynda ótti. Oǵan 40-tan asa elden kelgen 3000 áýesqoı sportshy qatysyp, Túrkistannyń kórikti jerlerin aralap, Bekzat Sattarhanov dańǵylymen áýejaıǵa qaraı júgirip ótip, márege qaıta oraldy.
Jarys sóresinde barlyq qatysýshyny Túrkistan oblysy ákiminiń orynbasary Ertaı Altaev quttyqtap, marafonǵa qatysýshylarǵa sáttilik tiledi.
«Búgin biz qalamyzdyń jáne elimizdiń ómirindegi mańyzdy jáne aıtýly oqıǵanyń biri – Túrkistan marafonynda jolyǵyp turmyz. Bul sporttyq mereke ǵana emes, erik-jigerdiń, batyldyqtyń merekesi. Túrkistan qalasynda osyndaı aýqymdy is-sharanyń ótip jatqanyna qýanyshtymyn. Marafon arqyly buqaralyq sport, salamatty ómir salty nasıhattalady. Mundaı sharalar elimizde buqaralyq sporttyń damýyna zor septigin tıgizedi dep senemin. Qoǵamda salaýatty urpaq qalyptastyrýǵa úles qosady. Sonymen birge Túrkistannyń týrıstik jáne sporttyq áleýeti tanystyrylady. Sondyqtan marafondar barlyq aýdan, qalada turaqty ótýi tıis. Túrkistan tórindegi marafon halyqaralyq deńgeıde tanylyp, shetelden de qatysýshylar sany kóbeıedi degen oıdamyn. Bul marafon sizderge tek jaǵymdy emotsııalar syılap, sporttaǵy jáne ómirdegi jańa jetistikterge bastama bola bersin!» – dedi oblys ákiminiń orynbasary Ertaı Kenjebekuly.
«Turkistan Marathon» marafonynyń qashyqtyǵy dástúrli túrde 10 shaqyrym spýtnıktik jarys, 21,1 shaqyrym jartylaı marafon, 42,2 shaqyrym marafon jáne 3 shaqyrym (10-14 jas aralyǵyndaǵy balalar) qashyqtyǵy bolyp bekitilgen.
Marafon AIMS halyqaralyq sóre men júgirý qaýymdastyǵynyń bir bóligi jáne trek World Athletics standarttaryna saı sertıfıkattalǵan.
Aıta ketsek, marafon aıasynda 35 jastan asqan qatysýshylar arasynda 42,2 shaqyrym júgirý jarysy boıynsha Qazaqstan Respýblıkasynyń chempıonaty ótedi. Jeńimpazdarǵa arnaıy qarjylaı jáne sertıfıkatty syılyqtar tabys etiledi.
Túrkistanda jylý qazandyqtary gazǵa aýystyrylǵanyn jazǵan bolatynbyz.
