Túrkistanda ótken kókpar dodasy elge erekshe kóńil-kúı syılady
TÚRKІSTAN. KAZINFORM — Túrkistan qalasynda ótken kókpardan álem chempıonaty tek sporttyq báseke ǵana emes, ulttyq rýhty asqaqtatqan aıtýly oqıǵa retinde este qaldy. Naýryz merekesi qarsańynda uıymdastyrylǵan dúbirli doda el ishinde erekshe serpilis týǵyzyp, kókpardyń qoǵamdaǵy mańyzyn taǵy bir márte aıqyndady.
Fınalda Qazaqstan quramasynyń Ózbekstandy 9:2 esebimen aıqyn jeńýi — ulttyq sporttyń damýy júıeli jolǵa túskeniniń kórinisi. Sheshýshi oıynda qazaqstandyq kókparshylardyń joǵary sheberligi men komandalyq úılesimdiligi aıqyn baıqaldy.
Toǵyz jyldyq úzilisten keıin qaıta jandanǵan álem chempıonatynyń dál Túrkistanda ótýi de kezdeısoq emes. Túrki áleminiń rýhanı astanasy sanalatyn qalada ulttyq sporttyń iri dodasyn ótkizý — tarıhı sabaqtastyqtyń belgisi. Onyń ústine, jańadan salynǵan zamanaýı atshabar halyqaralyq deńgeıdegi jarystardy qabyldaýǵa tolyq daıyn ekenin kórsetti.
Halyqaralyq týrnırge 9 elden komandalardyń qatysýy kókpardyń geografııasy keńeıip kele jatqanyn ańǵartady. Ásirese, Aýǵanstan quramasynyń alǵashqy qatysýynyń ózi bul sport túriniń áleýeti zor ekenin dáleldeıdi. Sarapshylar muny Qazaqstan tarapynan júrgizilgen ádistemelik jáne oqý-jattyǵý jumystarynyń jemisi dep baǵalap otyr.
Dúnıejúzilik kókpar qaýymdastyǵynyń prezıdenti Danııar Qobylandın týrnırdiń aýqymyna toqtalyp ótti. Onyń aıtýynsha, jarysqa bastapqyda 11 el shaqyrylyp, sonyń 9-y qatysqan.
— Naýryz merekesi qarsańynda jańa ıppodromda joǵary deńgeıdegi kókpar oıyny ótti. Aldaǵy ýaqytta mundaı jarystardy shetelderde de uıymdastyrýdy josparlap otyrmyz. Bıyl alǵash ret qatysqan Aýǵanstan quramasy da jaqsy oıyn kórsetti. Buǵan deıin bizdiń bapkerler osy elde oqý-jattyǵý jumystaryn júrgizgen bolatyn. Bul — sonyń naqty nátıjesi, — dedi ol.
Jarystyń Naýryz merekesimen tuspa-tus kelýi onyń áserin eseleı tústi. Atshabarǵa jınalǵan kórermender úshin bul tek sport emes, ulttyq dástúr men mádenıettiń kórinisine aınaldy. Kókpar — qazaq halqynyń bolmysyn, batyrlyq rýhyn, uıymshyldyǵyn kórsetetin biregeı mura ekeni taǵy da dáleldendi.
Eske sala keteıik, kókpardan álem chempıonaty sońǵy ret 2017 jyly ótken. Al aldaǵy 2026 jyly Qyrǵyzstanda ótetin VI Dúnıejúzilik kóshpendiler oıyndarynyń resmı baǵdarlamasyna qazaqtyń kókpary engizilip otyr. Bul — ulttyq sporttyń halyqaralyq deńgeıde moıyndalyp kele jatqanyn bildiredi.
Qazaqstan kókpar federatsııasynyń prezıdenti Aıdarbek Qojanazarov mundaı jarystardyń mańyzyn erekshe atap ótti.
— Barsha kókparsúıer qaýymdy quttyqtaımyn! Toǵyz jyl boıy kútken aıtýly doda joǵary deńgeıde ótti. Osyndaı halyqaralyq jarystardyń arqasynda kókpardyń damýyna jol ashylady. Aldaǵy chempıonattarda qatysýshy elder sanyn arttyra tússek, bul sport túri álemdik deńgeıde óz ornyn tabady, — dedi ol.
Jalpy júlde qorynyń 30 mıllıon teńgeni quraýy da týrnırdiń deńgeıin arttyrdy. Mundaı qoldaý sportshylardyń kásibı sheberligin shyńdap, kókpardyń básekege qabiletin kúsheıte túsedi.
Qoryta aıtqanda, Túrkistan tórinde ótken álem chempıonaty elge erekshe kóńil-kúı syılap qana qoımaı, kókpardyń bolashaǵyna degen senimdi nyǵaıtty. Endigi mindet — osy qarqyndy saqtap, ulttyq sportty álemdik deńgeıge júıeli túrde ilgeriletý.