Túrkistanda otbasyn qoldaý ortalyqtarynyń jumysyn jetildirýge baǵyttalǵan semınar bastaldy
TÚRKІSTAN. KAZINFORM - Túrkistan oblysynda otbasyn qoldaý ortalyqtary qyzmetkerleri jáne mobıldi toptarǵa arnalǵan respýblıkalyq oqytý-semınary bastaldy.
Іs-shara Mádenıet jáne aqparat mınıstrliginiń bastamasymen Qazaqstan boıynsha 2024 jyldyń 15 qazan-13 jeltoqsan aralyǵynda júrgiziledi. Túrkistan qalasynda 12-15 qarasha kúnderi Shymkent qalasy, Jambyl jáne Túrkistan oblystary ókilderiniń qatysýymen oqytý-semınaryn ótkizý josparlanǵan.
Dáristiń ashylýyna Mádenıet jáne aqparat mınıstrliginiń Jastar jáne otbasy isteri komıteti Otbasy saıasatyn úılestirý basqarmasynyń bas sarapshysy Іńkár Tursyn, oblystyq jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Kúmis Mırova arnaıy qatysyp, sáttilik tiledi.
Trenıngterdiń maqsaty – qıyn ómirlik jaǵdaıdaǵy otbasylarǵa sapaly kómek kórsetý úshin vedomstvoaralyq úılestirý barysynda qyzmetkerlerdiń kásibı quzyrettiliginiń sapasyn jaqsartý.
Іs-shara aıasynda qatysýshylar otbasylarmen jeke jumys josparlaryn qurý, praktıkalyq daǵdylaryn qalyptastyrý, dıagnostıka, josparlaý jáne kómek kórsetý monıtorıngin jaqsartýdy meńgeredi. Josparǵa sáıkes teorııalyq jáne praktıkalyq sabaqtar oqytylady. Biliktilikti arttyrý kýrsyn «Qoldau» QB sarapshysy, oqytý treneri Farıda Saǵyndyq ótkizýde.
Semınarǵa úsh aımaqtan qıyn ómirge tap bolǵan otbasylarmen jumys isteıtin áleýmettik qorǵaý, bilim, densaýlyq saqtaý, ishki ister salalarynyń mamandary, balalar qúqyqtary jónindegi ýákilderi, kámeletke tolmaǵan balalar, áıelder isteri men otbasylyq demografııalyq saıasat jónindegi komıssııa hatshylary men jergilikti jerlerde qurylǵan mobıldik toptardyń jetekshileri jáne ókilderi keldi.
Qazirgi tańda elimizde 43 otbasyn qoldaý ortalyǵy bar. Onyń tórteýi Túrkistan óńirinde jumys isteıdi. Jetisaı, Keles, Shardara men Saıram aýdandarynda «Otbasyn qoldaý ortalyǵy» KMM retinde ashylyp, azamattarǵa qyzmet kórsetýde. Sonymen qatar aýdandyq, qalalyq jumyspen qamtý jáne áleýmettik baǵdarlamalar bólimderi janynan 9 «Otbasyn qoldaý sektory» qurylǵan.
Olardyń negizgi fýnktsııasy - memlekettiń otbasylyq saıasat sharalaryn iske asyrý, qıyn ómirge tap bolǵan adamdardy (otbasylardy) qoldaý boıynsha jumysty úılestirý, turmystyq zorlyq-zombylyq belgileri bar adamdarǵa qoldaý kórsetý jáne mobıldi toptardyń jumysyn uıymdastyrý.
Jalpy oblystaǵy ortalyqtar men sektorlarda 130-ǵa jýyq maman búginge deıin 3400-den astam adamǵa kómek kórsetken. Az qamtylǵan, kópbalaly, múgedektigi bar balany tárbıelep otyrǵan analarǵa densaýlyq saqtaý máseleleri, jumyspen qamtý, múgedekterge kórsetiletin áleýmettik tólemder, turǵyn úıge kezekke turý, sertıfıkattar alý, quqyqtyq jáne medıatorlyq keńes, materıaldyq kómek, psıhologııalyq qoldaý, túrli psıhologııalyq jáne motıvatsııalyq trenıngter, ózge de oqý kýrstary, shaǵyn kásip ashý, grant alý, óz-ózine qyzmet kórsetý buryshtaryn qoldaný jáne taǵy basqa sharalar uıymdastyryldy.
