Túrkistanda Orta Azııada teńdesi joq «Eskek esý» arnasy ashyldy
TÚRKІSTAN. KAZINFORM — Túrkistan qalasynda Orta Azııada teńdesi joq sport keshenderi bar «Eskek esý» arnasy paıdalanýǵa berildi, dep habarlaıdy Túrkistan oblysy ákiminiń baspasóz qyzmeti.
Memleket basshysy Qasym-Jomart Toqaev Qazaqstan halqyna arnaǵan Joldaýynda «sport ınfraqurylymyn damytý men jańa keshenderdi salý» jóninde naqty tapsyrmalar berdi. Osy baǵytta oblysta 112 sport nysanynyń qurylysy júrgizilip jatyr. Bul tek ınfraqurylymdy damytý ǵana emes, jastardyń bolashaǵyna salynǵan ınvestıtsııa, turǵyndardyń salaýatty ómir saltyn qalyptastyrýǵa jasalǵan naqty qadam.
Biregeı sport nysanynyń ashylý saltanatyna oraı «Turkistan Water Fest & Sky Lights» atty aýqymdy mádenı-sporttyq is-shara ótti. Saltanatty sharaǵa arnaıy kelgen Týrızm jáne sport mınıstri E.Myrzabosynov, Esý sporty túrleri boıynsha «Qaıyq» federatsııasy AQB prezıdenti A.Merǵalıev, Baıdarka men kanoe esý halyqaralyq federatsııasynyń prezıdenti T.Konıetsko sóz alyp, óńir turǵyndaryna izgi tilegin jetkizdi.
Sonymen qatar mańyzdy sharaǵa Túrkistan oblysynyń ákimi Nuralhan Kósherov qatysyp, kópshilikti jańa nysannyń ashylýymen quttyqtady.
— Búgin biz úshin tarıhı jáne qýanyshty kún. Elimizde alǵash ret halyqaralyq standartqa saı keletin «Eskek esý» kanalyn ashqaly turmyz. Túrkistanymyz túrki álemin tańǵaldyratyn taǵy da bir zamanaýı nysanmen tolyqqaly tur. Bul Memleket basshysynyń tikeleı tapsyramasyna sáıkes, tarıhı Túrkistandy damytý baǵytyndaǵy júrgizilip jatqan naqty jumystardyń jemisi. Bıyl Prezıdentimiz «Túrkistan qalasynyń erekshe mártebesi týraly» arnaıy Zańǵa qol qoıdy. Qabyldanǵan Zańda Túrkistan qalasynyń rýhanı, tarıhı-mádenı, týrıstik ortalyǵy jáne sáýlet murasy retindegi erekshe mártebesi bekitildi. Qasıetti Túrkistandy rýhanı ǵana emes, bilim men ǵylymnyń, mádenıet pen sporttyń ortalyǵyna aınaldyrý — memleketimizdiń basty maqsatynyń biri. Búgingi saltanat is-shara — sol maqsattyń aıqyn dáleli, — dedi Nuralhan Oralbaıuly.
Ákimniń sózinshe, «Eskek esý» kanalynyń ereksheliginiń biri — qalanyń ekojúıesine de tikeleı áserin tıgizedi.
— Keshende Azııalyq jáne álemdik deńgeıdegi jarystardy uıymdastyrýǵa bolady. Shet eldik sportshylarǵa jyl on eki aı oqý-jattyǵý jıyndaryn ótkizýge tolyq múmkindik bar. Bul sport kesheni — Túrkistannyń ǵana emes, tutas qazaq eliniń abyroıyn kóteredi. «Eskek esý» kanaly óńir sportynyń damýyna serpin berip qana qoımaı, Túrkistannyń týrıstik áleýetin arttyrýǵa da zor úles qosady. Memleket basshysy «Elimizdiń keleshegi — oıy ushqyr, bilimi tereń, kózqarasy zamanaýı jastardyń qolynda» degen bolatyn. Endeshe, jastarymyz myqty bolsa — elimiz de qýatty bolady. Sondyqtan jastardy salaýatty ómir saltyn ustaýǵa, turaqty túrde sportpen aınalysýǵa shaqyramyn. Barshańyzdy Túrkistan qalasyndaǵy zamanaýı nysannyń ashylýymen shyn júrekten quttyqtaımyn! Bul sport ortalyǵynan bolashaq Olımpıada chempıondary shyǵa bersin, — dedi aımaq basshysy.
Búgin halyqaralyq baıdarka jáne kanoe esý federatsııasynyń prezıdenti Tomas Konıetsko men Qazaqstan Respýblıkasy «Qaıyq» federatsııasynyń prezıdenti Aslanbek Merǵalıev arasynda ekijaqty memorandýmǵa qol qoıyldy. Nátıjesinde, Ortalyq Azııa memleketteri arasyndaǵy alǵashqy óńirlik hab qurylmaq.
«Eskek esý» kanalynda 500-ge jýyq sportshy baıdarka men kanoeda esý, akademııalyq esý, trıatlon, parakanoe, ashyq sýda júzý sııaqty sport túrlerimen turaqty túrde jattyǵa alady. Oblystyń eskek esýshileri el abyroıyn kóterip keledi. Osy ýaqytqa deıin Qazaqstan Respýblıkasynyń chempıonattary men kýboktarynda 1 800-den astam medal ıelense (406 altyn, 730 kúmis, 676 qola), Álem jáne Azııa chempıonattarynda 184 medal qanjylady (58 altyn, 84 kúmis, 42 qola). Olımpıada oıyndaryna 9 lıtsenzııa alyndy.
Bul kúni Sh.Qaldaıaqov atyndaǵy oblystyq fılarmonııanyń kontserttik baǵdarlamasy usynyldy. Merekelik keshti Dınara Sátjan, Erkebulan Myrzabek, Marat Oralǵazın júrgizdi. Keshtiń ajaryn Muqasan Shahzadaev, Marhaba Sábı, Kalıfarnııa, Aqsuńqar, DJ Macarello, Túrkistan mýzykalyq teatry bıshileri, «Tańba» etno toby jáne «Samǵaý» bı ansambli ashyp, ónerlerin pash etti.
Sonymen qatar oblys ortalyǵynda merekelik atmosfera ornap, myń buralǵan bıshiler, anımatorlar men tsırk ónerpazdary keshendi aralap, kelýshilerdiń kóńil kóterdi. «Taiqazan» ulttyq taǵamdardyń gastronomııalyq jármeńkesi, qolónershiler kórmesi, áýe sharlary shoýy, kreatıvti fotozonalar, 10-ǵa jýyq master-klass, oıyn-saýyq aımaqtary uıymdastyrylyp, sý ústindegi sporttyq oıyndar men qoıylymdar, flaıbord shoýy, lazerli jáne fontan shoýlary, merekelik otshashý kópshilikti tánti etti.
Osy kúni oblys basshysy «Eskek esý» arnasynyń jattyǵý zalyn aralap, qolónershiler kórmesi men «Taiqazan» gastrofestıvalin tamashalady.
Aıta keteıik, bıyl 102 sport nysany paıdalanýǵa tapsyryldy. Kelesi jyly 10 sport ǵımaratyn tapsyrý josparlanyp otyr. Oblystaǵy erekshe qajettiligi bar azamattardy salaýattylyqqa tartý maqsatynda beıimdelgen 22 sport sektsııasy ashyldy. Túrkistanda zamanaýı «Túrkistan arena» stadıony, halyqaralyq tennıs ortalyǵy jáne Bekzat Sattarhanov atyndaǵy sport kesheni qyzmet etip jatyr.
Budan bólek, qysqy sport túrlerin damytý maqsatynda «Muz saraıy» ashyldy. Oblys tarıhynda alǵash ret shaıbaly hokkeı, mánerlep syrǵanaý jáne short-trek úıirmelerimen 400-den astam jasóspirim aınalysyp keledi.
Sonymen qatar Túrkistan qalasynda atshabar kesheniniń qurylysy qarqyndy júrgiziip jatyr. Bul nysan at sporty túrlerin damytýǵa, ulttyq dástúrdi jańǵyrtýǵa zor múmkindik beredi.