Túrkistanda nóserden keıin sý jınalǵan aýmaqtardy tazartý qalaı júrip jatyr
TÚRKІSTAN. KAZINFORM – Túrkistan qalasynda keıingi kúnderi jaýǵan tolassyz jaýyn jaıaý júrginshiler men kólik júrgizýshilerine qıyndyqtar týdyrdy.
Qala ákimdiginiń habarlaýynsha, qatty nóserden keıin magıstraldy qubyrlarda kedergiler paıda bolǵan jáne sol ýchaskelerde merdigerlerdiń esebinen qalpyna keltirý jumystary qolǵa alynǵan.
– Qala ákimi Ázimbek Pazylbekulynyń tapsyrmasyna sáıkes, káriz júıesi júrgizilgen kóshelerdegi kemshilikter retke keltirilip jatyr. Jalpy qala boıynsha 41 tehnıka jáne 100-ge jýyq sala mamandary jumyldyrylǵan. Anyqtalǵan aımaqtar qala ákimdiginiń qatań baqylaýyna alyndy, - delingen habarlamada.
«Túrkistan Sý» mekemesi dırektorynyń orynbasary Seıilbek Daırabaıdyń aıtýynsha, Naýryz kóshesinde, 1-shaǵynaýdanda jáne basqa sektorlarda qaladaǵy kommýnaldyq qyzmetter kúsheıtilgen rejımde jumys istep jatyr.
Budan buryn Túrkistan oblysynda ózen tasyp, 29 adam evakýatsııalanǵanyn jazǵan edik.
