Túrkistanda nómiriniń ornyna «NETÝ» dep jazǵan júrgizýshi kameraǵa túsip qaldy
TÚRKІSTAN. KAZINFORM — Túrkistan oblysynda memlekettik tirkeý nómiriniń ornyna «NETÝ» degen jazý qoıyp, avtomatty kameradan jasyrynbaq bolǵan júrgizýshi ustaldy.
Oqıǵa respýblıkalyq mańyzy bar Shymkent — Samara avtojolynyń 143-shaqyrymynda bolǵan. Jol boıyndaǵy avtomatty kamera arqyly jol qozǵalysy erejesin buzǵan kólik anyqtalyp, bul týraly patrýldik polıtsııa ınspektorlaryna aqparat túsken.
Baǵyttama boıynsha áreket etken polıtsııa qyzmetkerleri Toyota Camry avtokóligin toqtatyp, tekserý júrgizdi.
— Kóliktiń memlekettik tirkeý nómiriniń ornyna «NETÝ» degen jazý qoıylǵany anyqtaldy. Júrgizýshi Qyzylorda oblysynyń 29 jastaǵy turǵyny bolyp shyqty, — dep habarlady Túrkistan oblysy Polıtsııa departamenti.
Júrgizýshige kólik quraldaryn paıdalaný talaptaryn buzǵany jáne jol qozǵalysyna qatysýshylardyń qaýipsizdigin qamtamasyz etý talaptaryn saqtamaǵany úshin ákimshilik shara qoldanyldy. Avtokólik arnaıy turaqqa qoıyldy.
Buǵan deıin Túrkistan oblysynda nómirin jasyryp júrgen júrgizýshiniń qýlyǵy áshkerelengenin jazǵan edik.
