Túrkistanda nómirlengen 12 kóshe áli ataý almaǵan

TÚRKІSTAN. KAZINFORM – Qazirgi tańda oblys ortalyǵynda 800-den astam kóshe bar. Qala ákimdigi nómirlengen kóshelerge aldaǵy ýaqytta jańa ataý berý josparlanyp otyrǵanyn habarlady. 

Túrkistan qalasynyń ákimdigi usynǵan aqparatqa sáıkes, búginde shaharda 845 kóshe tirkelgen. Onyń ishinde 316 kóshe tarıhı tulǵalardyń esimimen atalsa, 451 kóshe jer-sý ataýlaryna berilgen. Sonymen qatar 48 kóshe dástúrli ataýlarǵa jatsa, 18 kóshe etnos ókilderiniń atymen atalǵan.

Vedomstvo málimetinshe, 2018 jyly Túrkistanda 330 kóshege ataý berilgen.

– Onyń barlyǵy dástúrli jáne jer-sý ataýlary tiziminen alynǵan. Al 2023 jyly nómirlengen birneshe kóshege Kúıbasar, Dástúr, Maılytoǵaı, Adnan Menderes, al bir dańǵylǵa Esim han esimi ataýy berilgen, - delingen ákimdik aqparatynda.

Degenmen ákimshilik-iskerlik ortalyqta 2023 jyly paıdalanýǵa berilgen 12 kóshe áli kúnge deıin ataýsyz, tek nómirmen belgilengen. Aldaǵy ýaqytta bul kóshelerge jer-sý ataýlaryn berý josparlanyp otyr.

– Nómirlengen 12 kóshege Ordaly, Aqotaý, Aqkent, Aqsý, Suńqar, Aqsaı, Kókjar, Qulager, Aqsaraı, Baıqonys, Aqbulaq jáne Hantáńiri sııaqty ataýlar berý kózdelgen, - dep habarlady vedomstvo.

Kóshe taqtaıshalaryn aýystyrý máselesi ázirge keıinge qaldyrylǵan. Qala ákimdigi 2025-2026 jyldary bul maqsatqa qarjy qaralmaǵanyn, 2027 jylǵa taldaý júrgizilip, qarjy bólýge suranys beriletinin málimdedi.

Budan buryn kóshe ataýlaryna arnaıy tizimge engen dástúrli ataýlar, jer-sý ataýlary, tarıhı tulǵalardyń ǵana ataýlary beriletinin jazǵan edik.