Túrkistanda naýqasty uzaq ýaqyt mazalap kelgen qýyqtaǵy 80 tas sátti alyndy

TÚRKІSTAN. KAZINFORM – Túrkistan qalalyq ortalyq aýrýhanasynda 60 jastaǵy naýqasqa teri arqyly júrgiziletin «tsıstolıtotrıpsııa» otasy jasaldy.

Patsıent kópten beri kishi dáretke barý kezinde aýyrsyný men jaısyzdyqqa shaǵymdanyp kelgen. Ambýlatorııalyq deńgeıde birneshe medıtsınalyq mekemede em qabyldaǵanymen, oń nátıje bolmaǵan.

Keshendi dıagnostıkalyq zertteýler barysynda qýyq qýysynda kóp mólsherde tas jınalǵany anyqtaldy.

– Dárigerler sheshimimen naýqasqa teri arqyly «tsıstolıtotrıpsııa» otasy jasaldy. Bul ota shaǵyn ınvazıvti, ıaǵnı teri tiligi az (shamamen 1 sm), ońaltý kezeńi men statsıonarlyq emniń qysqalyǵymen erekshelenedi. Ota barysynda qýyqtan 80 tas alyndy. Hırýrgııalyq ota sátti iske asty, – dep habarlandy oblystyq densaýlyq saqtaý basqarmasynan.

Otadan keıingi kezeń asqynýsyz ótken. Naýqastan 3-táýlikte kateter alynyp, 5 táýlikten keıin jaǵdaıynyń jaqsarýyna baılanysty oń kórsetkishpen úıine shyǵaryldy.

Budan buryn Shymkentte dárigerler bıikten qulaǵan naýqasqa sırek kezdesetin ota jasaǵanyn jazǵan edik.