Túrkistanda naýqastar MRT úshin jeke klınıkalarǵa barýǵa májbúr – basqarma jaýaby
TÚRKІSTAN. KAZINFORM – Oblystyq densaýlyq saqtaý basqarmasy Túrkistan qalalyq aýrýhanasynda MRT apparatynyń joqtyǵyna qatysty patsıentterdiń shaǵymyna jaýap berdi. Sonymen qatar mindetti áleýmettik medıtsınalyq saqtandyrý (MÁMS) júıesinde saqtandyrylǵan azamattardyń ne sebepti jeke klınıkalarǵa joldanatynyn túsindirdi.
Áleýmettik jelide Túrkistan qalalyq aýrýhanasynda MRT apparaty joq ekeni týraly aqparat tarady. Turǵyndardyń aıtýynsha, saqtandyrylǵanyna qaramastan olar aqyly jeke klınıkalarda tekserýden ótýge májbúr.
Oblystyq densaýlyq saqtaý basqarmasy MRT barlyq jaǵdaıda taǵaıyndalmaıtynyn jáne tek medıtsınalyq kórsetkishter boıynsha júrgiziletinin atap ótti.
– MRT júrgizý qajettiligin emdeýshi dáriger patsıenttiń jaǵdaıyn, aýrý belgilerin jáne ári qaraıǵy tekserý men emdeý taktıkasyn eskere otyryp anyqtaıdy, – delingen vedomstvo jaýabynda.
Shuǵyl jaǵdaılarda tekserý syrtqy medıtsınalyq uıymdar arqyly uıymdastyrylady.
– Patsıentke MRT zertteýin shuǵyl júrgizý qajet bolǵan kezde tekserý HQTÝ-diń klınıkasymen jáne «Elıt Med» dıagnostıkalyq ortalyǵymen kelisimshart negizinde júzege asyrylady. Medıtsınalyq kórsetkishter men patsıenttiń saqtandyrylǵan mártebesi rastalǵan jaǵdaıda, MRT tekserýi menshik nysanyna qaramastan MÁMS júıesi aıasynda tegin júrgiziledi, – dep málimdedi basqarma.
Jedel kórsetkishter bolmaǵan jaǵdaıda MRT tek ýchaskelik dárigerdiń joldamasy negizinde patsıenttiń tirkelgen nemese turǵylyqty jeri boıynsha josparly túrde júrgiziledi.
– Keıbir jaǵdaılarda dıagnoz qoıý úshin MRT júrgizý qajet bolmaıdy. Sebebi ony taǵaıyndaý týraly sheshim tek medıtsınalyq kórsetkishter negizinde qabyldanady jáne árbir ótinish úshin mindetti emes, – dep naqtylady vedomstvo.
Budan buryn Túrkistan oblysynyń prokýratýrasy memlekettik jáne jekemenshik medıtsınalyq uıymdardy tekserý barysynda MÁMS júıesinde qarajatty zańsyz alý jáne jumsaý faktilerin anyqtaǵanyn jazǵan edik.
