Túrkistanda múgedektigi bar jandar úshin kezekti bos jumys oryndary jármeńkesi ótti
TÚRKІSTAN. KAZINFORM - Túrkistan qalalyq Mansap ortalyǵynyń uıymdastyrýymen kezekti bos jumys oryndary jármeńkesi ótti.
Mansap ortalyǵynyń dırektory Raıhan Nurıdınqyzynyń málimdeýinshe, sharaǵa 30-dan asa jumys izdeýshi kelgen. Olarǵa memlekettik jumyspen qamtý baǵdarlamalary túsindirilip, turaqty jumystarǵa joldamalar berildi. Sondaı-aq, jármeńkege qatysýshylardyń arasynda turaqty jumysqa shaqyrtý alǵandar da boldy. Solardyń biri Dáýlet Nurekeshov CAPABLE GROUP mekemesine, Suńǵat Maratuly №9 Nekrasov atyndaǵy mektebine jumysqa ornalasty.
Shara barysynda 11 jumys berýshi mekeme 38 bos jumys ornyn usyndy.
«Jalpy, jyl basynan beri ortalyqta 8 bos jumys oryndary jármeńkesi uıymdastyryldy. Onda 2958 azamat turaqty jumysqa joldama aldy. Erekshe qajettiligi bar azamattar úshin jumyspen qamtý baǵdarlamalary júrgizilip, nátıjesinde jyl bastalǵaly 20 turǵyn turaqty jumysqa ornalasty» - delingen Túrkistan qalasy ákimdiginiń baspasóz qyzmeti taratqan aqparatta.
Aıta keteıik, búginde Túrkistan oblysynda 100 myńǵa jýyq múgedektigi bar turǵyn bolsa, onyń 15 myńdaıy 18 jasqa deıingi balalar.
Jańa bıznes-ıdeıalardy qoldaý úshin 300-den asa múgedektigi bar adamǵa qaıtarymsyz grant berildi. «Amanat» partııasynyń 2023-2027 jyldarǵa arnalǵan «HALYQPEN BІRGE!» saılaýaldy baǵdarlamasyn oryndaý boıynsha jol kartasyna sáıkes 2021-2024 jyldar aralyǵynda 1426 nysan beıimdeýden ótti. Sonymen qatar. partııanyń «Kedergisiz keleshek» jobasy aıasynda balalarǵa arnalǵan «Teń múmkindikter» atty ınklıýzııalyq sport festıvali uıymdastyryldy. Jumysqa ornalastyrýdan bastap, quqyqtyq, qarjylyq, psıhologııalyq taǵy da basqa keńes berý maqsatynda «TEN QOGAM» ortalyqtary oblystyń 15 aýdan, qalasynda ashylyp azamattarǵa qyzmetter usynýda. Ortalyqta túrli trenıngter, semınarlar, ekskýrsııalar uıymdastyrylýda.
