Túrkistanda múgedektigi bar azamattarǵa qoljetimsiz 19 nysan anyqtaldy
TÚRKІSTAN. KAZINFORM — Búginde Túrkistan oblysynda 104 200 múgedektigi bar adam tirkelgen. Bul — óńir halqynyń 4,8 paıyzy jáne respýblıkadaǵy múgedektigi bar azamattardyń 13,7%-y.
Olardyń 15 513-i, ıaǵnı 14,9 paıyzy — múgedektigi bar balalar. Al 88 165 adam nemese 85 paıyzy — 18 jastan asqan eresekter.
Bıyl qansha adamǵa alǵash ret múgedektik belgilendi
2026 jyldyń qańtar-tamyz aılarynda 22 554 azamat medıtsınalyq-áleýmettik saraptamadan ótti. Onyń ishinde 4500 adamǵa alǵash ret múgedektik belgilendi. Bul ótken jyldyń sáıkes kezeńindegi 4504 kórsetkishpen shamalas.
— Eresekter arasynda alǵash ret múgedektik belgilengen azamattardyń eń kóbi, ıaǵnı 30 paıyzyna qan aınalymy júıesiniń aýrýlary sebep bolǵan. Odan keıin qaterli isikter — 17,4 paıyz, súıek-bulshyqet júıesiniń aýrýlary — 9,1 paıyz, — dedi Halyqty áleýmettik qorǵaý salasyndaǵy retteý jáne baqylaý komıteti Túrkistan oblysy boıynsha departament basshysynyń orynbasary Marat Arharov.
Al múgedektigi bar balalar arasynda júıke júıesiniń aýrýlary basym — 27,1 paıyz. Týa bitken damý anomalııalarynyń úlesi — 20,9 paıyz, psıhıkalyq jáne minez-qulyq buzylystary — 19,7 paıyz.
14 myńǵa jýyq azamat qaıta kýálandyryldy
Sondaı-aq jyl basynan beri 17 866 azamat qaıta kýálandyrýdan ótti. Nátıjesinde olardyń 13 991-i múgedektigi bar adam retinde tanyldy. Byltyr osy kezeńde 17 394 adam qaıta kýálandyrylyp, 13 801 azamatqa múgedektik belgilengen.
Múgedektikti syrttaı belgileý jáne qaıta kýálandyrý boıynsha da tsıfrlyq qyzmetter kórsetilip keledi. Bıyl 9990 azamat syrttaı kýálandyryldy.
54 tekserý júrgizilip, 4 mln teńgege jýyq aıyppul salyndy
Múgedektigi bar adamdardyń quqyqtaryn qorǵaý jáne nysandardyń qoljetimdiligin qamtamasyz etý maqsatynda 54 tekserý júrgizildi.
Onyń 26-sy profılaktıkalyq baqylaý, 27-si jospardan tys tekserý bolsa, bir nysan oblystyq, qalalyq jáne aýdandyq prokýratýralardyń usynýy negizinde tekserildi.
— Tekserý qorytyndysy boıynsha anyqtalǵan kemshilikterdi joıý jóninde 51 nusqama berildi. Sonymen qatar Ákimshilik quqyq buzýshylyq týraly kodekstiń 83-babyna sáıkes 19 nysanǵa jalpy somasy 3 mln 979 myń teńge aıyppul salynyp, tolyq óndirildi, — dedi Marat Arharov.
Jańa nysandardyń qoljetimdiligi qalaı baqylanady
Múgedektigi bar adamdar úshin kedergisiz orta qalyptastyrý baǵytynda bıyl jańa talaptar engizildi.
2026 jylǵy 1 shildeden bastap Qurylys kodeksine sáıkes, Áleýmettik qorǵaý salasyndaǵy retteý jáne baqylaý komıtetiniń aýmaqtyq departamentterine jańadan paıdalanýǵa beriletin nysandardyń qoljetimdilik talaptaryna sáıkestigi týraly deklaratsııalardy kelisý fýnktsııasy berildi.
— Osyǵan baılanysty departamentke 22 ótinish tústi. Onyń ishinde úsh ǵımarat boıynsha deklaratsııa kelisildi. Bir ótinish ıesiniń ózi keri qaıtaryp aldy. Bes nysanǵa mundaı kelisim talap etilmeıdi. Taǵy segiz nysan boıynsha qujattar qaralyp jatyr. Bes nysan boıynsha kelisim berýden bas tartyldy, — dep málimdedi vedomstvo.
Eske salaıyq, buǵan deıin áleýmettik qyzmetkerlerdiń aýtızmi bar balalardyń otbasylarymen qalaı jumys isteıtini týraly jazǵan edik.
