Túrkistanda múgedektigi bar 6758 adamnyń tirkelgen mekenjaıynda turmaıtyny anyqtaldy
TÚRKІSTAN. KAZINFORM — Búginde Túrkistan oblysynda múgedektigi bar 104 313 adam tirkelgen. Bul — óńir halqynyń 5 paıyzy. Ótken jyldyń osy kezeńimen salystyrǵanda olardyń sany 1912 adamǵa artqan.
Óńirde aýdan jáne qala ákimdikteriniń qatysýymen arnaıy jumys toby qurylǵan. Qazirgi ýaqytta múgedektik taǵaıyndaýdyń negizdiligin jáne azamattardyń tehnıkalyq ońaltý quraldaryna naqty qajettiligin anyqtaý maqsatynda zerdeleý jumystary júrgizilip jatyr.
— Zerdeleý nátıjesinde múgedektigi bar 6758 adamnyń júıede kórsetilgen mekenjaı boıynsha turmaıtyny anyqtaldy. Onyń ishinde 6599-y tirkelgen mekenjaıynan basqa jerge kóship ketken. Osyǵan baılanysty Halyqty áleýmettik qorǵaý salasyndaǵy retteý jáne baqylaý komıtetiniń Túrkistan oblysy boıynsha departamenti tıisti júıege túzetýler engizýi qajet. Sonymen qatar 8949 azamatty qaıta kýálandyrý jáne olardyń ońaltý quraldaryna naqty muqtajdyǵy qosymsha zerdeleýdi qajet etetini belgili boldy, — delingen oblystyq jumyspen qamtýdy úılestirý jáne áleýmettik baǵdarlamalar basqarmasy usynǵan málimette.
Budan bólek, óńirde kelesi jyldan bastap muqtajdyq qaǵıdatyn kezeń-kezeńimen engizý tetikterin jetildirý kózdelip otyr. Osy maqsatta oblys boıynsha 500 myńǵa jýyq otbasynyń áleýmettik jaǵdaıyna keshendi baǵalaý júrgiziledi. Muqtajdyq qaǵıdatyn engizý boıynsha pılottyq jobany 2027 jylǵy 1 qańtardan bastap iske asyrý josparlanǵan.
Buǵan deıin Túrkistanda múgedektigi bar azamattarǵa qoljetimsiz 19 nysan anyqtalǵanyn jazǵan edik.
