Túrkistanda moped tizgindegen 21 jasóspirimniń ata-anasy jaýapqa tartyldy
TÚRKІSTAN. KAZINFORM – Keıingi bir apta ishinde qalada 8 moped tirkelip, memlekettik nómir aldy.
Jyl basynan beri patrýldik polıtseıler skýter men moped júrgizýshilerinen 26 zań buzýshylyq anyqtap, kólikterin aıypturaqqa kirgizgen. Sonymen qatar skýter men moped tizgindegeni úshin 21 jasóspirimniń ata-anasyn ákimshilik jaýapkershilikke tartty.
Al, búgin Túrkistan qalasynyń patrýldik polıtsııa batalon basshylyǵy jergilikti moped júrgizýshilerimen kezdesti. Olardy aldaǵy ýaqytta moped júrgizý úshin aldyn ala tirkeýden ótýge shaqyrdy. Sondaı-aq júrgizýshi kýáligi joq bolǵan jaǵdaıda, avtokólik mektepterinde oqýǵa keńes berdi.
— 5 sáýirge deıin moped tirkelmese jáne júrgizýshi kýáligi bolmasa, mundaı kólik quraldaryn paıdalaný zańsyz dep tanylady. Osy rette Túrkistan qalasynda keıingi bir apta ishinde 8 moped tirkeýge alyndy. Moped júrgizýshileriniń basym bóligi qazirgi tańda jetkizý qyzmetinde jumys isteıdi, - delingen Túrkistan oblysy polıtsııa departamentiniń baspasóz qyzmeti usynǵan aqparatta.
Aıta keteıik, budan buryn Shymkentte qaryzyn qaıtara almaǵan turǵyndy bir top jigit sabap tastaǵanyn jazǵan bolatynbyz.